म. टा. खास प्रतिनिधी, मुंबई केईएम रुग्णालयातील 'डायमंड ज्युबिली सोसायटी ट्रस्ट'मध्ये पाच कोटींचा घोटाळा झाल्याचा धक्कादायक प्रकार उघडकीस आला आहे. ट्रस्टचे लेखापाल श्रीपाद देसाई व सहायक लेखापाल राजन राऊळ यांच्यावर हा गैरव्यवहार केल्याचा आरोप आहे. याप्रकरणी केईएमचे अधिष्ठाता डॉक्टर हेमंत देखमुख यांच्या तक्रारीवरून भोईवाडा पोलिस ठाण्यात गुन्हा दाखल करण्यात आला असून राजन राऊळ याला अटक करण्यात आली आहे. केईएम रुग्णालयाला ६० वर्षे पूर्ण झाल्याच्या निमित्ताने १९९१च्या सुमारास तत्कालीन प्राध्यापक-शिक्षक व माजी विद्यार्थ्यांच्या पुढाकाराने 'डायमंड ज्युबिली सोसायटी ट्रस्ट' या नावाने संस्थेची स्थापना करण्यात आली होती. या ट्रस्टची स्थापना आरोग्य, वैद्यकीय व सामाजिक या विभागातील संशोधन करण्यासाठी करण्यात आलेली आहे. याशिवाय ट्रस्ट मार्फत मुंबई तसेच देशभरातील गरीब, गरजू, कामगारांना मदत केली जाते. तसेच ट्रस्टच्या माध्यमातून शिक्षण, प्रशिक्षणास प्रोत्साहन देणे, आरोग्य विभागात नवीन संशोधन केले जाते. अनेक संस्थांना आरोग्य यंत्रणा विकसित करण्यास तसेच रुग्णसेवेस मदत करण्याचे कामही केले जाते. ट्रस्टचे कामकाज करण्यासाठी दोन अकाऊंटट, एक सहाय्यक अकांऊटट व एक ऑफिस बॉय यांची नेमणूक करण्यात आलेली आहे. देसाई आणि राऊळ यांना लेखापाल म्हणून नियुक्त केले होते. देसाई आणि राऊळ यांनी सन २००९-१०पासून सन २०२०-२१ या कालावधीत ट्रस्टमध्ये जमा असलेली रक्कम वेळोवेळी त्यांच्या नावावर असलेल्या युनिक ट्रेडींग कंपनी व साई समर्थ ट्रेडर्स तसेच त्यांच्या वैयक्तिक खात्यात व इतर व्यक्तींच्या बँक खात्यामध्ये जमा केली. अशारितीने बँकेतून ३ कोटी ८० लाख रूपये वळविले. यासाठी ट्रस्टचे माजी विश्वस्थ डॉ. अविनाश एन. सुपे व डॉ. निर्मला रेगे यांच्या खोट्या सह्या करण्यात आल्या. इतकेच नाही तर रोख रकमेतून एक कोटी ४४ लाख रुपयांचा गैरव्यवहार केला. हा प्रकार समोर आल्यानंतर केईएमच्या वतीने दोघांविरुद्ध गुन्हा दाखल करण्यात आला. स्वायत्त संस्था; पालिकेचे स्पष्टीकरण डायमंड ज्युबिली सोसायटी ट्रस्ट ही संस्था पूर्णपणे स्वायत्त असून ती बृहन्मुंबई महापालिका किंवा केईएम रुग्णालयाच्या अखत्यारित नाही. या स्वायत्त संस्थेच्या निधीमध्ये संस्थेचे कंत्राटी कर्मचारी असणाऱ्यांनी अपहार केल्याचे निदर्शनास आले आहे. त्यामुळे एफआयआर दाखल करण्यात आल्याची माहिती संस्थेचे मानद अध्यक्ष व केईएम रुग्णालयाचे अधिष्ठाता डॉक्टर हेमंत देशमुख यांनी दिली आहे. या दोन्ही कर्मचाऱ्यांना यापूर्वीच कामावरून काढून टाकल्याचेही त्यांनी सांगितले.
0 Comments