विनामास्क प्रवाशांमध्ये घट की, कारवाई थंड?

म. टा. प्रतिनिधी : लोकलमधून प्रवास करताना करोना संसर्ग रोखण्यासाठी प्रवाशांना मास्क बंधनकारक करण्यात आला आहे. रेल्वे स्थानकावर मास्क तपासण्यासाठी महापालिकेकडून मार्शलची नियुक्ती करण्यात आली असून, मे महिन्यात एका दिवशी सर्वांत कमी अर्थात अवघ्या दोन प्रवाशांवर कारवाईची नोंद करण्यात आली आहे. अत्यावश्यक सेवेतील कर्मचाऱ्यांसाठी सुरू असलेल्या मुंबई लोकलमधून सध्या दररोज अंदाजे १५ लाख प्रवासी प्रवास करत आहेत. स्थानकातील चोरवाटांनी, बनावट ओळखपत्रांद्वारे प्रवास करणाऱ्यांपैकी अनेक जण विनामास्क आढळून येतात. यामुळे रेल्वेतील विनामास्क प्रवाशांमध्ये खरेच घट झाली आहे, की कारवाईचा जोर थंडावला आहे, असा प्रश्न या निमित्ताने उपस्थित होत आहे. १ ते १७ मे या कालावधीत विनामास्क प्रवास करणाऱ्या एकूण ६०८ प्रवाशांवर महापालिकेच्या मार्शलकडून कारवाई करण्यात आली. या प्रवाशांकडून १ लाख ३९ हजार रु.चा दंड वसूल करण्यात आला. या महिन्यात सोमवार, १७ मे रोजी सर्वांत कमी अर्थात दोन प्रवाशांवर महापालिकेच्या मार्शलकडून कारवाई करण्यात आली. फेब्रुवारीमध्ये ४०१७ प्रवाशांवर कारवाई करत ६,२९,६०० रुपये वसूल करण्यात आले होते. मार्च महिन्यात ६९१२ प्रवाशांकडून १०,९३,५०० रु. आणि एप्रिल महिन्यात २६४६ प्रवाशांकडून ५,५५,१७०० रुपयांचा दंड वसूल करण्यात आला आहे. सध्या मुंबईतील करोना रुग्ण दुपटीचा कालावधी ३०० दिवसांपार पोहोचला आहे. चाचण्यांमध्ये घट झाल्याने नवीन करोना रुग्णसंख्याही कमी झाली आहे. करोना रोखण्यासाठी लसीकरण, मास्कचा योग्य वापर आणि सुरक्षित वावर या त्रिसूत्रीचे पालन करणे गरजेचे आहे. विनामास्क प्रवाशांना सूट दिल्यास पुन्हा करोना वाढीस लागण्याची शक्यता आहे. विनामास्क प्रवाशांवरील कारवाई महिना प्रकरण दंड (रुपयांमध्ये) फेब्रुवारी ४०१७ ६,२९,६०० मार्च ६९७२ १०,९३,५०० एप्रिल २६४६ ५,५१,७०० मे ६०८ १,०३,९००