धारावीकरांना दिलासा; करोना रुग्णसंख्या घटली

म. टा. विशेष प्रतिनिधी : मुंबईत करोनाच्या दुसऱ्या लाटेत धारावीतील रुग्ण संख्या आटोक्यात आली आहे. धारावीसह दादर, माहीममध्ये २८ नवीन रुग्णांची नोंद झाली आहे. त्यात माहीममध्ये १३, धारावीत ८ आणि दादरमध्ये ७ रुग्णांचा समावेश आहे. मुंबईत काही दिवसांपूर्वी वाढलेली रुग्ण संख्या कमी होत असतानाच धारावीतही रुग्णसंख्येबाबत सकारात्मक दृश्य दिसू लागले आहे. गेल्यावर्षी करोनाच्या प्रादूर्भावानंतर धारावीतही त्याचे पडसाद उमटले होते. गजबजलेली वस्ती, अरुंद गल्ल्या, लोकसंख्येची अधिक घनता अशा विविध घटकांमुळे धारावीतील संसर्गाविषयी नेहमीच चिंता व्यक्त होते. करोनाच्या पहिल्या लाटेनंतर दुसऱ्या लाटेतही धारावीतील परिस्थिती हाताबाहेर जाण्याची भीती व्यक्त होत होती. मात्र, सध्या संपूर्ण मुंबईत रुग्ण संख्या कमी होत असून, धारावीसह दादर, माहीममध्येही त्याचा प्रत्यय येत आहे. तत्पूर्वी फेब्रुवारीच्या मध्यापासून रुग्ण संख्या वाढल्याने धारावी, माहीम, दादरमध्येही रुग्ण वाढत गेले होते. साधारण महिनाभरापूर्वी तीनही विभागांतील रुग्णांची संख्या ३७५वर पोहोचली होती. तेव्हा तातडीने चाचणी, उपचारांच्या आधारे त्यावर नियंत्रण आणण्यात यश आले. बुधवारी धारावीत आठ नवीन रुग्ण आढळत असतानाच तिथल्या उपचाराधीन रुग्णांची संख्या ३९४ आहे. त्याचप्रमाणे दादरमध्ये नवीन सात रुग्ण आढळले असतानाच उपचाराधीन रुग्णांची संख्या ९९१ आहे. माहीममध्ये नवीन १३ रुग्ण आढळले असून तिथल्या उपचाराधीन रुग्णांची संख्या ९७३ इतकी आहे.