दुसरी लाट उतरणीला; मुंबई, ठाण्यात रुग्णांच्या संख्येत घट

म. टा. विशेष प्रतिनिधी : संसर्गाची दुसरी लाट हळुहळू उतरणीला लागली असून; मुंबई आणि ठाण्यामध्ये सक्रिय रुग्णसंख्या कमी होऊ लागली आहे. दुसऱ्या लाटेमध्ये पंधरा दिवसांपूर्वी मुंबईची सक्रिय रुग्णसंख्या कमी झाली नव्हती; मात्र ठाण्यात रुग्णसंख्या कमी होताना दिसत होती. पहिल्या लाटेशी तुलना करता दुसऱ्या लाटेमध्ये सक्रिय रुग्णसंख्या उतरणीला लागल्याचे दिलासादायक चित्र आहे. मुंबईमध्ये पहिल्या लाटेतील सर्वाधिक सक्रिय रुग्णसंख्या ३४,२५९ इतकी नोंदवण्यात आली आहे. तर १८ मे रोजी मुंबईमध्ये ३१,७९० रुग्णसंख्या नोंदवण्यात आली. हे प्रमाण मुंबईत ७.२१ टक्क्यांनी कमी झाले आहे. ठाण्यात पहिल्या लाटेतील सर्वाधिक सक्रिय रुग्ण हे ३८,३८८ होते. १८ मे रोजी ही संख्या २८,२५७ नोंदवण्यात आली. हा बदल २६.३९ टक्के आहे. मुंबई-ठाण्याप्रमाणे रायगडमध्येही करोना संसर्गाचे प्रमाण सर्वाधिक होते. या प्रमाणामध्येही ३४.९० टक्क्यांची घट आहे. पहिल्या लाटेमध्ये ११,०५६ असणारी करोना रुग्णांची संख्या ७,१९८ नोंदवण्यात आले आहे. तर पुण्यामध्ये ८२,१७२ सक्रिय रुग्णसंख्या होती. ती आता ७२,०८९ नोंदवण्यात आली आहे. वैद्यकीय तज्ज्ञांच्या मते पहिल्या लाटेच्या तुलनेमध्ये मुंबई, आणि रायगडमध्ये सक्रिय रुग्णसंख्या कमी झाली असली तरीही या रुग्णसंख्येमध्ये अधिक घट होणे अपेक्षित आहे. संसर्गजन्य आजाराचे तज्ज्ञ डॉ. रवी मोहिते म्हणाले, दुसऱ्या लाटेमध्ये तरुणांना संसर्ग होण्याचे प्रमाण अधिक दिसत असल्यामुळे पूर्वी ज्या व्यक्ती करोना संसर्गापासून बचाव करण्यासाठी कोणतेही नियम पाळत नव्हते, त्यांच्या वर्तनामुळे संसर्गाच्या भीतीने मास्क वापरणे, सुरक्षित अंतर ठेवण्याचे प्रमाण वाढले आहे. जगभरामध्ये करोना संसर्गाचे प्रमाण पाहिल्यास दीड ते दोन महिन्यांमध्ये संसर्ग वाढत जाऊन त्यानंतर तो हळुहळू खाली यायला सुरुवात होते. पहिल्या आणि दुसऱ्या लाटेमधील सक्रिय रुग्णसंख्येचा तौलनिक अभ्यास केला असता, या लाटेमध्ये संसर्गाचे प्रमाण कमी झाल्याचे दिसते. मात्र सक्रिय रुग्णसंख्येमध्ये पुणे, मुंबई, ठाणे, नागपूर, सोलापूर या पाचही जिल्ह्यांमध्ये सक्रिय रुग्णसंख्या इतर जिल्ह्यांशी तुलना करता अधिक आहे. पुण्यात ७२,०८९, मुंबईत ३१,७९०, ठाण्यात २८,२५६, नागपूरमध्ये २६,७९४ सक्रिय रुग्णसंख्येची नोंद करण्यात आली आहे. रुग्णालयात दाखल : सक्रिय रुग्णांच्या ३४.४ टक्के लक्षणविरहित किंवा सौम्य लक्षणे : ६६.६ टक्के गंभीर रुग्ण : सक्रिय रुग्णांच्या १५.३९ टक्के आयसीयूमधील रुग्ण : ५.३० टक्के व्हेंटिलेटरवरील रुग्ण : १.८२ टक्के ऑक्सिजनवरील रुग्ण : ३.४८ टक्के आयसीयूबाहेरील ऑक्सिजनवरील रुग्ण : १०.९ टक्के