बोगस ई-पासचे धागेदोरे जिल्हाधिकारी कार्यालयापर्यंत

म. टा. खास प्रतिनिधी, मुंबई करोनाकाळात एकीकडे लोकांचे जीव जात असताना दुसरीकडे इंजेक्शनचा काळाबाजार, खोटे करोना अहवाल आणि बोगस ई-पासचा सुळसुळाट सुरूच आहे. अंधेरीच्या डी. एन. नगर पोलिसांनी देणाऱ्या एकाला अटक केली असून, त्याने जवळपास चारशे बोगस ई-पास विकल्याची माहिती समोर आली आहे. जिल्हाधिकारी कार्यालयातील एका कर्मचाऱ्याच्या मदतीने हे पास तयार केले जात होते, अशी माहिती या तरुणाने दिल्याने त्या व्यक्तीचा पोलिस शोध घेत आहेत. करोना संसर्गाची साखळी तोडण्यासाठी राज्यात कडक निर्बंध लावण्यात आले आहेत. विनाकारण घराबाहेर पडण्यास मनाई करण्यात आली आहे तर एका जिल्ह्यातून दुसऱ्या जिल्ह्यात जाण्यासाठी ई-पास बंधनकारक करण्यात आला आहे. लोकनाची गरज ओळखून या परिस्थतीचा काही भामटे पुरेपूर फायदा घेत आहेत. मिरा रोड परिसरातील एक व्यक्ती पैसे घेऊन नागरिकांना ई-पास देत असल्याची माहिती अतिरिक्त पोलिस आयुक्त संदीप कर्णिक यांना मिळाली. या माहितीची शहानिशा करण्यासाठी डी. एन. नगर पोलिसांनी ग्राहक बनून आमीर मुन्शी नाव असलेल्या या तरुणाशी संपर्क साधला. संशय येऊ नये यासाठी गुगल पेच्या माध्यमातून ई-पास तयार करण्यासाठी लागणारे पैसे देखील ट्रान्सफर केले. खात्री पटल्यानंतर डी. एन. नगर पोलिसांच्या पथकाने मिरा रोड येथील घरातून आमीर याला ताब्यात घेतले. आमीर याची कसून चौकशी केली असता जिल्हाधिकारी कार्यालयातील एका व्यक्तीच्या मदतीने हे पास तयार करीत असल्याचे त्याने सांगितले. या व्यक्तीला ३०० रुपये देऊन आमीर ग्राहकांकडून चारशे ते पाचशे रुपये एका पासचे घेत होता. चारशेपेक्षा अधिक लोकांना ई-पास दिल्याचे त्याने म्हटले आहे. जिल्हाधिकारी कार्यालयातील आमीर याला मदत करणारी व्यक्ती नेमकी कोण याचा शोध सुरू असल्याचे पोलिसांनी सांगितले.