२६ कोटींचे हेरॉइन विमानतळावर जप्त

म. टा. प्रतिनिधी, नार्कोटिक्स कंट्रोल ब्युरोची () अमली पदार्थविरोधी कारवाई अद्याप सुरूच आहे. त्याअंतर्गत छत्रपती शिवाजी महाराज विमानतळावरून २६ कोटी रुपयांचे हेरॉइन शनिवारी जप्त करण्यात आले. झांबियाच्या एका नागरिकास या वेळी पाठलाग करून अटक करण्यात आली. एनसीबीच्या मुंबई संचालनालयांतर्गत क्षेत्रीय संचालक समीर वानखेडे यांच्या नेतृत्वाखाली आठ महिन्यांपासून अमली पदार्थ दलाल व तस्करांविरुद्ध जोमाने कारवाई सुरू आहे. शनिवारी या प्रवाशास अटक केल्यानंतर तस्करीचा वेगळा मार्ग समोर आला. झांबियाचा केनिथ मुलोवा हा प्रवासी अस्ताव्यस्त स्वरूपातील ट्रॉली बॅग घेण्यासाठी विमानतळावर आला होता. त्याच वेळी एनसीबीच्या पथकाने छापा टाकला. तपासणीवेळी बॅगच्या आतील आच्छादानात अमली पदार्थ लपविण्यात आल्याचे दिसून आले. हे आच्छादन फाडले असता त्यात हेरॉइनची तीन पाकिटे होती. त्यांचे वजन चार किलो होते. बाजारात त्यांची किंमत २६ कोटी रुपये आहे. एनसीबीने मागील दोन दिवसांपासून विमानतळ परिसर, तसेच आजुबाजूच्या हॉटेलवर नजर ठेवली होती. त्यानुसार एनसीबीच्या पथकाने हॉटेलपासून ते विमानतळापर्यंत या झांबियन नागरिकाचा पाठलाग केला. त्याने बॅग ताब्यात घेताच छापा टाकण्यात आला व साठा जप्त करून, त्याला अटक करण्यात आली, असे वानखेडे यांनी सांगितले. मुख्य म्हणजे, या कारवाईवेळी एनसीबीच्या एका अधिकाऱ्याने एअर इंडियाच्या कर्मचाऱ्याचा गणवेश घातला होता. त्यामुळे आरोपी गोंधळला व त्यातच त्याला अटक करण्यात आली. मुलोवा हा झांबिया लष्करातील निवृत्त सैनिक आहे. त्याने विमानतळ परिसरातील करोना नियमांचेही उल्लंघनही केले असल्याने त्यानुसार कारवाई होणार आहे.