'विमानांच्या नोंदणीत ब्रिटिशांचे अस्तित्व कशासाठी?'

म. टा. विशेष प्रतिनिधी, 'देशाच्या स्वातंत्र्याला सात दशके उलटल्यानंतरही भारतीय विमानांच्या नोंदणीत ब्रिटिशांच्या कालावधीतील निश्चित झालेल्या (व्हिक्टोरियन टेरिटरी किंवा व्हाइसरॉय टेरिटरी) या दोन अक्षरांचाच वापर का केला जात आहे? व्हीए ते व्हीझेड अक्षरे ही ब्रिटिश वसाहतींमधील विमानांच्या नोंदणीसाठी निश्चित झाली होती. आपण आजही ब्रिटिश वसाहतीतील व्हीटी ही अक्षरेच विमानांच्या नोंदणीत स्वीकारत आहोत? आपल्याला देशाभिमान नाही का? आपल्या देशाची काही प्रतिष्ठा नाही का?', असे प्रश्न उपस्थित करत माजी उद्योगपती व पद्मभूषण डॉ. विजयपत सिंघानिया व पुण्यातील व्यावसायिक विजय सेठी यांनी मुंबई उच्च न्यायालयात रिट याचिका केली आहे. 'नेपाळ, पाकिस्तान, फिजी, श्रीलंका या देशांनी स्वातंत्र्य मिळवल्यानंतर त्यांच्या विमानांच्या नोंदणीसाठी अक्षरे बदलवून घेण्यात यश मिळवले. मात्र, भारताला अद्याप तसे करता आलेले नसून आपण ब्रिटिशांचीच अक्षरे धारण करून आहोत. जणू काही आपण अद्याप ब्रिटिशांच्याच साम्राज्याखाली आहोत. हा एकप्रकारे भारताच्या स्वातंत्र्याचा अपमान आहे. खुद्द देशाचे राष्ट्रपती व पंतप्रधान ज्या विमानातून प्रवास करतात ती विमानेही व्हीटी अशा अक्षरांची नोंदणी असलेली असतात, हे दुर्दैवी आहे', असे म्हणणे याचिकादारांनी अॅड. असीम सरोदे व अॅड. अजिंक्य उडाने यांच्यामार्फत केलेल्या या याचिकेत मांडले आहे. निर्देश द्यावेत 'केंद्र सरकारच्या हवाई वाहतूक मंत्रालयाने या प्रश्नी आंतरराष्ट्रीय विमान वाहतूक संघटनेकडे (आयसीएओ) पाठपुरावा करणे आवश्यक असताना तसे होत असल्याचे दिसत नाही. आयसीएओच्या डेटाबेसमध्ये बीएच (भारत या शब्दाच्या अनुषंगाने) किंवा एमजी (महात्मा गांधी यांच्या नावाच्या अनुषंगाने) ही अक्षरे आहेत. त्यामुळे केंद्र सरकारने आतापर्यंत या प्रश्नी कोणते प्रयत्न केले आणि व्हीटी अक्षरांऐवजी नवी अक्षरे मिळवण्यासाठी कोणता कृती आराखडा आखला आहे, याचा तपशील न्यायालयाने मागवावा. तसेच एमजी किंवा बीएच ही अक्षरे नोंदणीसाठी मिळवण्याकरिता प्रयत्न करण्याचे निर्देश केंद्र सरकारला द्यावेत', अशी विनंतीही याचिकेत केली आहे. ही याचिका जूनमध्ये सुनावणीस येण्याची शक्यता आहे.