अनाथ बालकांसाठी जिल्हास्तरीय कृतिदल

म. टा. प्रतिनिधी, करोना महामारीच्या काळात पालक मृत्युमुखी पडल्यामुळे आधाराविना असलेली बालके तसेच, दोन्ही पालक रुग्णालयामध्ये दाखल असल्यामुळे देखभाल होऊ शकत नाही अशा बालकांच्या मदतीसाठी सरकारने जिल्हास्तरीय कृतिदल नियुक्त केले आहे. अशी संकटग्रस्त बालके आढळून आल्यास अथवा त्याबाबतची माहिती मिळाल्यास , मुंबई शहर जिल्हा बालसंरक्षण कक्ष अथवा, बालकल्याण समितीच्या क्रमांकावर संपर्क साधावा, असे आवाहन मुंबई शहर जिल्हाधिकारी राजीव निवतकर यांनी केले आहे. या बालकांबाबत माहिती देण्यासाठी २४ तास कार्यरत चाइल्डलाइन हेल्पलाइन १०९८, जिल्हा बाल संरक्षण कक्ष, मुंबई शहर ०२२-२४९२२४८४, बालकल्याण समिती, मुंबई शहर एक व दोन- ९३२४५५३९७२, ९८६७७२८९९४ या क्रमांकावर संपर्क साधावा, असे आवाहन करण्यात आले आहे. करोनामुळे पालक दगावलेल्या अथवा उपचार घेत असलेल्या बालकांचे संपूर्ण संरक्षण, संगोपन, कायदेशीर हक्क व पुनर्वसन सुविधा उपलब्ध करून देण्याची जबाबदारी या कृतिदलाची आहे. त्यासाठी सर्व संबंधितांनी सतर्कतेने संवेदनशीलरीत्या काम करावे, करोनारुग्णांना दाखल करून घेताना प्रवेश अर्जावर (ॲडमिट फॉर्म) त्यांच्या मुलांबाबत सविस्तर माहिती भरून घ्यावी, अशा घटना यापूर्वी घडल्या असतील तर त्याबाबतही माहिती जमा करावी, असे निर्देश त्यांनी संबंधितांना दिले आहेत.