कल्याणपल्याड राहणाऱ्यांना मिळावी लोकलमुभा; रेल्वे प्रवासी संघटनांचे पत्र

म. टा. प्रतिनिधी मुंबई : करोना काळात आलेल्या चक्रीवादळामुळे अनेकांचे घरांचे मोठे नुकसान झाले आहे. गेल्या वर्षभरापासून पोटाला चिमटा काढून सर्वसामान्य माणूस जगत आहे. त्यातच ७५५ एसटी गाड्या रद्द झाल्याने कल्याणपल्याड राहणाऱ्यांना मुंबई गाठण्यासाठी तारेवरची कसरत करावी लागत आहे. यामुळे किमान या नागरिकांना प्रवासाची मुभा द्यावी, अशी मागणी पत्राद्वारे सर्व उपनगरीय रेल्वे प्रवासी संघटनांनी केली आहे. 'ब्रेक द चेन' नियमांनुसार लॉकडाउन सध्या सुरू आहे. गेल्या पंधरवड्यापासून करोना रुग्णसंख्येत कमालीची घट झालेली आहे. पावसाळ्यापूर्वी आलेल्या चक्रीवादळाने अनेकांच्या घरांचे मोठे नुकसान केले. जूनच्या पहिल्या आठवड्यात पावसाळा सुरू होईल. यापूर्वी घरांवर ताडपत्री टाकणे, तात्पुरती दुरुस्ती करणे आवश्यक आहे. करोना काळात सामान्यांवर असलेल्या लोकलबंदीमुळे अनेकांची कमाई बंद आहे. दुसरीकडे काही नागरिकांकडून बनावट ओळखपत्राद्वारे निर्बंध पायदळी तुडवून सर्रासपणे लोकल प्रवास केला जात आहे. कसारा-कर्जत-खोपोलीपासून कल्याण-ठाणे-मुंबई गाठण्यासाठी लोकलशिवाय सार्वजनिक वाहतुकीचे स्वस्त आणि वेगवान साधन नाही. आधी एसटी नाममात्र होती. आता तीदेखील बंद झाली. मुंबई लोकलमधून सर्वसामान्यांना प्रवासमुभा मिळाल्याशिवाय शहराचे अर्थचक्र वेगवान होणार नाही. यामुळे गर्दी टाळण्यासाठी टप्प्याटप्प्याने लोकलमुभा देणे क्रमप्राप्त ठरेल. त्यानुसार कल्याणपुढील नागरिकांना लोकल प्रवासाची परवानगी द्यावी. अन्यथा, उपासमारीने मरणारे वाढतील, असे पत्रही सर्व संघटनांच्या वतीने मुख्यमंत्री उद्धव ठाकरे यांना देण्यात आले आहे. रेल्वे सल्लागार समिती सदस्य मनोहर शेलार, प्रवासी महासंघाचे अध्यक्ष नंदकुमार देशमुख, कल्याण-कसारा-कर्जत प्रवासी संघटनेचे राजेश घनघाव आणि महिला प्रवासी संघटनांनी या मागणीला दुजोरा दिला आहे.