अंमली पदार्थांची अवाक पुन्हा वाढली

म. टा. खास प्रतिनिधी, पहिल्या लॉकडाउनमुळे मुंबईत थांबलेली ड्रग्जची आवक पुन्हा वाढल्याचे दिसून येत आहे. मुंबई पोलिस आणि गुन्हे शाखेच्या कारवाईमुळे ही बाब समोर आली आहे. आठवड्याभरात पोलिसांनी लाखो रुपयांचे कोकेन, एमडी, गांजा, अफिम यांसारखे अंमली पदार्थ जप्त करून अनेकांची धरपकड केली आहे. मुंबई पोलिस, गुन्हे शाखा, तसेच अंमली पदार्थविरोधी पथकाच्या वतीने मुंबईत ड्रग्जची तस्करी, विक्री, तसेच सेवन करणाऱ्यांवर बारीक नजर ठेवली जात आहे. राज्यात कडक निर्बंध असले तरी छुप्या मार्गाने अंमली पदार्थ येण्याचे प्रकार सुरूच आहेत. अंमली पदार्थविरोधी पथकाच्या कांदिवली युनिटचे प्रभारी पोलिस निरीक्षक रुपेश नाईक यांच्या पथकाने गोरेगाव येथील पशू कॉलेजच्या समोरून एका २० वर्षांच्या तरुणाला ताब्यात घेतले. अंगझडतीमध्ये त्याच्याकडे १० लाखांचे कोकेन आणि सुमारे १२ लाखांचे एमडी ड्रग्ज सापडले. नवी मुंबई येथे राहणाऱ्या एका नायजेरियन तरुणाकडून हे ड्रग्ज खरेदी केल्याची माहिती त्याने दिली. भायखळा पोलिस ठाण्याचे वरिष्ठ पोलिस निरीक्षक अशोक खोत यांच्या मार्गदर्शनाखाली सहायक निरीक्षक श्यामराव पाटील, उपनिरीक्षक शशिकांत ढाणे यांनी माझगाव परिसरात नशेबाजांविरुद्ध कोम्बिंग ऑपरेशन हाती घेतले. त्यामध्ये सोनाराम बिष्णोई ऊर्फ सुनील याच्याकडून एक किलो अफिम हस्तगत करण्यात आले. आझाद मैदान येथील अंमली पदार्थविरोधी पथकाचे पोलिस हवालदार नाईक यांना वरळी परिसरात एका व्यक्तीकडे मोठा प्रमाणात गांजाचा साठा असल्याची माहिती मिळाली. प्रभारी पोलिस निरीक्षक राजेंद्र दहिफळे यांच्या मार्गदर्शनाखाली वरळी दूध डेअरी वसाहतीजवळ छापा टाकून शिवकुमार बसय्या याला अटक केली. शिवकुमारकडे असलेल्या गोणीमध्ये सुमारे ४० किलो गांजा सापडला.