'किती दिवस घरात बसायचे, अंगाला व्यायाम नको का ?' म्हणत तरुणांनी केली पोलिसांना शिवीगाळ अन्...

म. टा. खास प्रतिनिधी गिरगाव : करोनामुळे घरात कोंडलेल्या मुंबईकरांना पाय मोकळे करण्यासाठी निश्चित केलेल्या वेळेव्यतिरिक्त घराबाहेर पडण्याचा विचार करीत असाल तर सावधान...या कृतीबद्दल तुमच्यावर कारवाई होऊ शकते. सकाळ-संध्याकाळी समुद्रकिनाऱ्यावर फेरफटका मारण्यासाठी जाण्याची सवय मुंबईकरांना घरात बसू देत नाही. अशाच दोन तरुणांना मनाई असताना चौपाटीवर फिरणे अंगलट आले. पोलिसांनी रोखल्यावर त्यांचे ऐकण्याऐवजी त्यांच्यासोबतच हुज्जत घालणाऱ्या या दोघांवर दादासाहेब भडकमकर मार्ग पोलिस ठाण्यात गुन्हा दाखल करण्यात आला आहे. करोनाची साखळी तोडण्यासाठी मुंबईसह राज्यभरात कडक निर्बंध लावण्यात आले आहेत. उद्याने, चौपाट्या तसेच सार्वजनिक ठिकाणी जाण्यास मनाई करण्यात आली आहे. मुंबईतील सर्व उद्याने, बागा बंद ठेवण्यात आल्या असून, चौपाट्या, समुद्रकिनाऱ्यावर पोलिस बंदोबस्त ठेवण्यात आला आहे. सर्व ठिकाणी कडक कारवाई सुरू असताना २० मे रोजी गिरगाव चौपाटीवर दक्षिण मुंबईत राहणारे दोन तरुण जॉगिंगसाठी गेले. दादासाहेब भडकमकर मार्ग पोलिस ठाण्यातील एका उपनिरीक्षकाने दोघांना पाहिले. त्यांनी या दोघांना चौपाटीवर जाण्यास मनाई केली. करोनामुळे या ठिकाणी बंदी असल्याचे हा अधिकारी त्यांना सांगत होता. त्यांना कारण पटवून देत असताना त्यांच्यातील एक तरुण उपनिरीक्षकासोबत हुज्जत घालू लागला. किती दिवस घरात बसायचे, अंगाला व्यायाम नको का, असे उलटसुलट बोलू लागला. यावर 'तुम्हाला आतमध्ये सोडता येणार नाही आणि तसे केल्यास कायदेशीर कारवाई केली जाईल', असे या पोलिस अधिकाऱ्याने समजावून सांगितले. पोलिस समजूत काढत होते; मात्र हे दोघे ऐकण्याच्या मनःस्थितीत नव्हते. दोघांनी पोलिसांना शिवीगाळ करण्यास सुरुवात केली. अंगावर धावून येत असल्याचे पाहून उपनिरीक्षकाने पोलिसांची अधिक कुमक मागवली. अतिरिक्त पोलिस फौजफाटा मागवूनही दोघांची अरेरावी काही कमी होत नसल्याने पोलिसांनी दोघांनाही ताब्यात घेतले. 'घराबाहेर पडू नका' सरकारी कामात अडथळा, लॉकडाउनच्या नियमांचे उल्लंघन तसेच अन्य कलमान्वये या दोघांवर गुन्हा दाखल करण्यात आला. दुसऱ्या लाटेत लावण्यात आलेले निर्बध अद्याप शिथिल करण्यात आले नसून, कुणीही विनाकारण बाहेर पडू नये, असे आवाहन पोलिसांनी केले आहे.