लशींच्या जागतिक निविदेला प्रतिसाद नाही!

म. टा. विशेष प्रतिनिधी, मुंबई मुंबई महापालिकेने एक कोटी लशींच्या खरेदीसाठी मागवलेल्या जागतिक निविदेला सोमवारपर्यंत एकाही कंपनीने प्रतिसाद दिलेला नाही. आज, १८ मे हा निविदा भरण्याचा शेवटचा दिवस असून अपेक्षित प्रतिसाद न मिळाल्यास त्यास एक आठवड्याची मुदतवाढ दिली जाणार आहे. मुंबईकरांचे वेगवान लसीकरण करण्यासाठी पालिकेने एक कोटी लशींची खरेदी करण्याचा निर्णय घेतला असून त्यासाठी जागतिक पातळीवर निविदा मागवल्या आहेत. १८ मे ही निविदा भरण्याची अंतिम तारीख आहे. भारतात सध्या सीरम आणि भारत बायोटेक या दोनच देशी कंपन्यांच्या लशींना एमआयसीआर आणि केंद्र सरकारच्या आरोग्य विभागाने मान्यता दिली आहे. त्यामुळे सध्या देशभरात या कंपन्यांच्या कोव्हॅक्सीन आणि कोव्हिशिल्डमार्फत लसीकरण मोहीम सुरू आहे. रशियाच्या स्पुटनिक लशीला भारतात मान्यता मिळाली असून ती ही लस लवकरच बाजारात उपलब्ध होऊ शकेल. या व्यतिरिक्त अनेक परदेशी कंपन्यांनी केंद्र सरकारकडे भारतात लस निर्मिती व विक्रीची परवानगी मागितली आहे. मात्र प्रयोगशाळांतील चाचण्या आणि अन्य सरकारी परवानग्या मिळालेल्या नसल्याने सीरम, भारत बायोटेक आणि स्पुटनिक या तीनच कंपन्या देशभरात कोणत्याही सरकारी यंत्रणांच्या निविदा प्रक्रियेत भाग घेण्यास पात्र आहेत. मात्र पालिकेची निविदा प्रक्रिया पूर्ण होईपर्यंत अन्य परदेशी कंपन्यांना केंद्र सरकारच्या परवानग्या मिळाल्यास त्या सहभागी होऊ शकतील. त्यामुळे अधिक स्पर्धा होईल, या अंदाजाने मागवल्याचे पालिकेचे म्हणणे आहे. दरम्यान, पालिकेची जागतिक पातळीवरील निविदा भरण्याची मुदत आज मंगळवारी दुपारी एक वाजता संपणार आहे. मात्र सोमवारी रात्रीपर्यंत एकाही कंपनीने प्रतिसाद दिलेला नाही. या वृत्तास पालिकेचे अतिरिक्त आयुक्त पी. वेलरासू यांनी दुजोरा दिला आहे. मंगळवारपर्यंत किती कंपन्या प्रतिसाद देतात, याची वाटू पाहू; नाही तर निविदेला आणखी एक आठवड्याची मुदतवाढ दिली जाणार आहे, अशी माहिती वेलरासू यांनी दिली.