नोकरीचा शोध बेरोजगारांना पडतोय महागात; पोलिसांनी केले 'हे' आवाहन

म. टा. खास प्रतिनिधी, करोना संसर्गामुळे लागू करण्यात आलेल्या लॉकडाउनची मुदत वाढत असल्याने अनेक जण नोकऱ्या व रोजगार गमावत आहेत. या स्थितीत नव्या नोकरीचा शोध घेणे अनेक बेरोजगारांना चांगलेच महागात पडत आहे. नोकरी देणाऱ्या संकेतस्थळावरील डेटाचोरी करून नोकरीच्या शोधात असलेल्यांना सायबर भामटे लाखोंचा गंडा घालत असल्याचे उघड झाले आहे. नोकरीच्या बहाण्याने फसवणूक करण्याचे प्रकार मुंबईत वाढले असून ऑनलाइन नोकरी शोधताना सावधगिरी बाळगण्याचे आवाहन पोलिसांनी केले आहे. वडाळा येथे राहाणाऱ्या एका तरुणाने नोकरी उपलब्ध करून देणाऱ्या अनेक संकेतस्थळावर नोंदणी केली होती. कोलकाता येथील प्लेसमेंटमधून या तरुणाला फोन आला. सौदी आंतरराष्ट्रीय विमानतळावर नोकरीची संधी असल्याचे प्लेसमेंटमधून फोन करणाऱ्या महिलेने सांगितले. कायमस्वरूपी नोकरी मिळणार असल्याने या तरुणाने गुगल पेच्या माध्यमातून ३,५०० रुपये नोंदणी शुल्क पाठवले. एका आठवड्यानंतर याच महिलेचा पुन्हा फोन आला आणि तिने वैद्यकीय तपासणीसाठी ३० हजार रुपये पाठविण्यास सांगितले. मागणीनुसार पैसे मिळत असल्याचे पाहून तिने व्हिसासाठी १ लाख २५ हजार, प्रोसेसिंग फी ३७ हजार ५०० रुपये मागितले. यानंतर या तरुणाने ही रक्कम ऑनलाइन ट्रान्सफर केली. काही आठवड्याने दुसऱ्या महिलेने त्याच्याशी फोनवरून संपर्क साधला आणि वेगवेगळी कारणे सांगून आणखी रक्कम घेतली. या तरुणाने तब्बल ३ लाख ३६ हजार रुपये कोणतीही शहानिशा करता पाठविले. विशेष म्हणजे स्वतःकडे पैसे नसल्याने त्याने मित्रांकडून घेऊन दिले. यानंतर मात्र प्लेसमेंटमधून काहीच प्रतिसाद मिळत नसल्याने या तरुणाने अँटॉप हिल पोलिस ठाण्यात तक्रार केली. अन्य एका घटनेत अंधेरी साकीनाका येथील हॉटेल मॅनेजमेंट केलेल्या तरुणीने स्वत:साठी आणि आईसाठी ऑनलाइन नोकरीशोध सुरू केला. साकीनाका येथील प्लेसमेंटमधून दोघींना बोलावणे आले. येथील कार्यालयात उपस्थित असलेल्या अधिकारी आणि कर्मचाऱ्यांनी दोघींची मुलाखत घेतली. मालदीव येथील एका बड्या रिसॉर्टमध्ये सुपरवायझर म्हणून नोकरी असून २ वर्षांचा करार करावा लागेल, असे सांगण्यात आले. तसेच त्या ठिकाणी राहाण्याचे, खानावळ, ५ वर्षांचा व्हिसा, एअर तिकीट, मेडिक्लेम, कपडे, इत्यादींचे एकूण अडीच लाख रुपये आगाऊ भरावे लागतील. यातील सत्तर टक्के रक्कम आधी आणि उर्वरित तीस टक्के रक्कम पगारातून कापण्यात येईल, अशी माहिती देण्यात आली. चांगल्या पगाराची नोकरी मिळत असल्याने या तरुणीने दोन लाख रुपये भरले. पैसे भरल्यानंतर प्लेसमेंटकडून उडवाउडवीची उत्तरे मिळू लागली. पैसेही परत देत नसल्याने तिने साकीनाका पोलिस ठाण्यात तक्रार केली. आणखी काही घटना अॅक्सिस बँकेत नोकरी लावण्याच्या बहाण्याने मशिद बंदर येथील एका तरुणीला १ लाख ३८ हजारांचा गंडा घालण्यात आला. तर, वांद्रे येथे एका तरुणाकडून नोंदणी, करिअर डेव्हलपमेंट शुल्क, सुरक्षा शुल्क, कागदपत्र प्रोसेसिंग आदीसाठी २ लाख ८४ हजार रुपये उकळण्यात आले. ट्रॉम्बे, चिता कॅम्पमध्ये वास्तव्यास असलेल्या एका गृहिणीला एका लिंकवर माहिती भरण्यास सांगून तिच्या बँक खात्यावरून ३३ हजार परस्पर काढून घेतले गेले.