'ते' युरेनियम अणु ऊर्जा विभागाकडे सुपुर्द

म. टा. विशेष प्रतिनिधी, मुंबई मुंबईत सापडलेला नैसर्गिक युरेनियमचा सात किलोचा अवैध साठा अणु ऊर्जा विभागाकडे सुरक्षित ठेवण्यात आला आहे. याचबरोबर या घटनेची माहिती आंतरराष्ट्रीय अणु ऊर्जा यंत्रणेला (आयएईए) देण्यात आल्याचे अणु उर्जा विभागातर्फे सांगण्यात आले आहे. मुंबईत काही दिवसांपूर्वी युरेनियमचा हा अवैध साठा आढळला होता. या प्रकरणी दोघांना अटक करण्यात आली असून पुढील तपास राष्ट्रीय तपास यंत्रणा करत आहे. केवळ अणु ऊर्जा विभागाला वापराची परवानगी असलेल्या युरेनियमचा साठा या प्रकारे कसा उपलब्ध झाला यावर तपास सुरू आहे. याबाबत अणु ऊर्जा विभागाने माहिती दिली आहे. यामध्ये मुंबईत सापडलेला नैसगिक युरेनियमचा साठा आता आमच्या ताब्यात आहे. याचा वापर अणु ऊर्जेच्या निर्मितीसाठी होतो. याचबरोबर टेलिथेरपी विभागांमध्ये सुरक्षा कवच निर्माण करण्यासाठी तसेच, विमान उत्पादनातही याचा वापर होतो. या नैसर्गिक युरेनियममधूनही अल्फा पार्टिकल्सचे उत्सर्जन होत असते. ते मानवी त्वचा किंवा साध्या कागदाने रोखले जातात. मात्र त्याचा रासायनिक दुष्परिणाम होण्याची भीतीही असते. या प्रकरणाचा पुढील तपास संबंधित तपास यंत्रणा करत आहे, असे विभागाच्या पत्रकात म्हटले आहे. सुरक्षेसंबंधी नियम कठोर ही घटना 'आंतरराष्ट्रीय अणु ऊर्जा यंत्रणे'च्या 'इन्सिडन्ट अॅण्ड ट्रॅफिकिंग डेटाबेस'मध्ये नोंदविण्यात आल्याचेही विभागाच्या जनमाहिती विभागाचे प्रमुख आर. के. वत्स यांनी सांगितले. किरणोत्सर्ग करणाऱ्या वस्तूंसह अणू ऊर्जेच्या सुरक्षेबाबतही कठोर नियम असल्याचेही त्यांनी या पत्रकात स्पष्ट केले आहे.