वाहनातच लस सुविधा राष्ट्रीय उद्यानातही; पालिकेकडून लवकरच पूर्तता

म. टा. विशेष प्रतिनिधी, मुंबई मुंबईत लसीकरण मोहिमेत निर्माण झालेल्या अडचणींवर मात करण्यासाठी पालिकेने 'ड्राइव्ह इन' लसीकरणाचा पर्याय शोधला आहे. मुंबईतील काही विभागात वाहनतळांकडे ज्येष्ठ नागरिक आणि दिव्यांगाना त्यांच्या वाहनांत लस देण्याची संकल्पना राबविली जात आहे. त्याधर्तीवर लवकरच बोरिवलीतील संजय गांधी राष्ट्रीय उद्यानात ड्राइव्ह-इन लसीकरण केंद्र सुरू होणार आहे. उद्यान प्रशासनाने पालिकेच्या विनंतीस संमती दिल्याने काही दिवसांतच उद्यानाकडील वाहनतळावर ही मोहीम सुरू केली जाणार आहे. राज्यात लॉकडाउन लागू झाल्यानंतर सर्वच पर्यटनस्थळांकडे पर्यटकांना बंदी केली आहे. बोरिवलीतील संजय गांधी राष्ट्रीय उद्यानातदेखील पर्यटकबंदी आहे. या उद्यानात पर्यटकांसाठी असलेल्या मुख्य प्रवेशद्वारानजीकच उद्यान प्रशासनाने वाहनतळ उभारले आहे. सध्या, या वाहनतळावर पर्यटकांची वाहने उभी राहत असल्याने ही जागा मोकळी आहे. या विस्तृत वाहनतळाचा वापर ड्राइव्ह-इन लसीकरणासाठी करण्याच्या उद्देशाने पालिकेने उद्यान प्रशासनाशी संपर्क साधला. मुंबईतील इतर विभागांप्रमाणेच बोरिवली परिसरातही ड्राइव्ह-इन लसीकरण सुरू करता येईल, हा उद्देश त्यामागे होता. पालिकेच्या आर/मध्य विभाग सहाय्यक आयुक्तांनी त्याप्रकारे पत्र उद्यानाचे वनसंरक्षक-संचालक यांना पाठविले होते. पालिकेने ड्राइव्ह-इन लसीकरणासाठी दाखविलेल्या स्वारस्यानंतर उद्यान प्रशासनाने त्याचा आढावा घेतला. त्यानंतर उपलब्ध असलेल्या वाहनतळाकडे ड्राइव्ह-इन लसीकरण शक्य असल्याचे निष्पन्न झाले. त्याआधारे उद्यानाचे वनसंरक्षक-संचालक मल्लिकार्जुन यांनी आर-मध्य सहाय्यक आयुक्तांना पत्र पाठवून या लसीकरण मोहिमेस संमती दर्शवली आहे. केवळ लसीकरणासाठी उद्यानातील वाहनतळाकडे ड्राइव्ह इन लसीकरणासाठी सकाळी ७ ते सायंकाळी ५.३० या वेळेत लसीकरण करता येईल, असे नमूद केले आहे. तसेच लसीकरणासाठी येणाऱ्यांना उद्यानात प्रवेश दिला जाणार नसल्याचेही स्पष्ट करण्यात आले आहे. उद्यानात ड्राइव्ह इन लसीकरण सुरू झाल्यास आर-मध्य विभागातील हजारो ज्येष्ठ नागरिक, दिव्यांगांचे लसीकरण सोपे आणि सुटसुटीत होईल, असाही दावा केला जात आहे.