लोकलबंदीमुळे डबेवाले झाले बेरोजगार; राज्य सरकारकडे केली 'ही' मागणी

म. टा. प्रतिनिधी मुंबई : करोनाकाळात लॉकडाउन निर्बंध, कार्यालयात १० टक्के मनुष्यबळाला परवानगी आणि लोकलबंदी यामुळे सध्या सर्वच बेरोजगार झाले आहेत. या अडचणीच्या काळात रिक्षाचालकांप्रमाणेच डबेवाल्यांना ५ हजार रु.ची मदत करण्यात यावी, अशी मागणी मुंबई डबेवाला असोसिएशनने केली आहे. 'ब्रेक द चेन' अंतर्गत महाराष्ट्र सरकार लॅाकडाउन शिथिल करणार आहे व लॅाकडाउनमध्ये १ जूनपासून काही घटकांना सवलती देणार आहे. या सवलतींमध्ये डबेवाल्यांनाही व्यवसाय करायला सवलत दिली गेली पाहिजे, असे मुंबई डबेवाला असोसिएशनचे अध्यक्ष सुभाष तळेकर यांनी सांगितले. सध्या बहुतांशी डबेवाले कौटुंबिक गरजा भागविण्यासाठी मिळेल ते काम करत आहेत. स्वयंरोजगार क्षेत्रातील डबा पोहोचविण्याचा व्यवसाय लॉकडाउनमुळे पूर्ण ठप्प झाला आहे. काही डबेवाले जवळ अंतराचे डबे सायकलच्या माध्यमातून पोहचवत आहे. परंतु लांब अंतराचे डबे डबेवाल्याला पोहचवणे शक्य नाही. तेव्हा जेव्हा कधी लॅाकडाऊन चे नियम शिथिल केले जातील, त्यावेळी डबे पोहचवणारी सेवा आत्यावश्क सेवा मानून डबेवाल्याला लोकलने प्रवास करू देण्यात यावा, अशी मागणी होत आहे. अनेकांच्या सायकली पडून राहिल्यामुळे नादुरुस्त झाल्या असून अनेक सायकली निकामी झाल्या आहेत. त्यांच्या दुरुस्तीवरही खर्च येणार आहे. महाराष्ट्र सरकार लॉकडाउन काळात प्रत्येक रिक्षा चालकाला दीड हजार रुपये मदत म्हणून देत आहे. 'मुंबईतील डबेवाल्यांना सरकारने प्रत्येकी पाच हजार रुपये मदत करावी व ती मदत थेट डबेवाल्यांच्या बँक खात्यात जमा करावी. रिक्षाचालकांना मदत मिळण्यास सुरुवात झाली आहे. आता डबेवाल्यांनाही मदत देण्यात यावी, अशी मागणी मुंबई डबेवाला असोसिएशनने राज्य सरकारकडे केली आहे.