राज ठाकरेंची कलाकारांशी चर्चा

म. टा. प्रतिनिधी, करोनाकाळात हिंदी-मराठी मालिकांचे राज्यात पुन्हा सुरू होण्याबाबत महाराष्ट्र नवनिर्माण सेनेचे अध्यक्ष यांनी मराठी मनोरंजन क्षेत्रातील जाणकार आणि कार्यरत असलेल्या मंडळींशी गुरुवारी 'ऑनलाइन' संवाद साधला. या वेळी त्यांनी कलाकार, तंत्रज्ञांच्या अडचणी जाणून घेतल्या. सतीश राजवाडे, महेश कोठारे, महेश मांजरेकर, प्रशांत दामले, केदार शिंदे, अंकुश चौधरी, पुष्कर श्रोत्री, प्रसाद ओक, जितेंद्र जोशी, अवधूत गुप्ते, सई ताम्हणकर आदी कलाकार या वेळी उपस्थित होते. करोनाच्या वाढत्या प्रादुर्भावामुळे महाराष्ट्रात दोन महिन्यांपूर्वी लॉकडाउन जाहीर करण्यात आले होते. परिणामी चित्रपट आणि मालिकांच्या चित्रीकरणावर राज्यात बंदी घालण्यात आली. त्यामुळे सध्या बहुतांश हिंदी-मराठी टीव्ही मालिकांचे चित्रीकरण परराज्यात सुरू आहे. मात्र, आता महाराष्ट्रातील करोनाची परिस्थिती नियंत्रणात आली असताना मनोरंजनसृष्टीला पुन्हा काम सुरू करण्याची परवानगी राज्य सरकारकडून मिळावी असा सूर मनोरंजनसृष्टीतून उमटतो आहे. नाट्यसृष्टी, चित्रपटसृष्टी, संगीत, टीव्ही मालिका या क्षेत्रात कार्यरत असलेल्या पन्नासहून अधिक मंडळींसोबत राज ठाकरे यांनी 'व्हिडिओ कॉन्फरन्स'द्वारे संवाद साधला. कलाकारांच्या मागण्या राज्यात चित्रीकरणाला परवानगी मिळावी, राज्यभरातील लोककलावंतांसाठी विशेष पॅकेज जाहीर करावे, वाद्यवृंद कलावंत आणि बॅकस्टेज कामगारांना अनुदान देण्यात यावे आणि त्यांच्या लसीकरणासाठी विशेष व्यवस्था करण्यात यावी, अशा विविध मागण्या कलाकारांनी राज ठाकरे यांच्याकडे केल्या.