दिलासादायक! मुंबईत २२ दिवसांत २ लाख करोनामुक्त

म. टा. विशेष प्रतिनिधी, मुंबईत करोनाच्या दुसऱ्या लाटेस थोपविण्यासाठी प्रयत्नांची पराकाष्ठा केली जात आहे. सध्या रुग्णसंख्या नियंत्रणात येत असल्याचा दावा केला जात असतानाच घरी विलगीकरणात असलेल्या रुग्णांची घट होण्याचेही प्रमाण मोठ्या प्रमाणात वाढत आहे. मागील २२ दिवसात मुंबईत घरी विलगीकरणात असलेल्या रुग्णांची संख्या दोन लाखाहून अधिक प्रमाणात घटली आहे. त्याचवेळी एका वर्षात घरी विलगीकरणातून मुक्त झालेल्यांची एकूण संख्या ६७,८९,२४६ अशी नोंदवली गेली आहे. मुंबईत काही दिवसांपूर्वी करोना रुग्णांसह घरी विलगीकरणात असलेल्यांचे प्रमाणही वाढले होते. मात्र, गेल्या काही दिवसांपासून रुग्णसंख्या आणि घरी विलगीकरणात असलेल्यांची संख्याही घटत चालली आहे. २८ एप्रिल रोजी घरी विलगीकरणातील रुग्णसंख्या ६ लाख २७ हजार ७३७ पर्यंत पोहोचली होती. तर २८ एप्रिलच्या तुलनेत १८ मेमधील घरी विलगीकरणात असलेल्या रुग्णांची संख्या पाहिल्यास त्यात घट झाली आहे. या २२ दिवसांची तुलना केल्यास त्यात २ लाख ६ हजार ११६ संख्येने घट झाल्याचे आढळून आले आहे. १८ मेपर्यंत संपूर्ण शहरात ४ लाख २१ हजार ६२० करोना बाधित रुग्ण हे घरी विलगीकरणात आहेत. फेब्रुवारी मध्यानंतर वाढत गेलेली रुग्णसंख्या १० ते ११ हजारांपर्यंत गेली होती. ती संख्याही कमी होताना घरी विलगीकरणात असलेल्यांची संख्या हळूहळू कमी होत आहे. तारीख- घरी विलगीकरणात असलेले रुग्ण २८ एप्रिल-६,२७,६३६ ५ मे-५,३५,०९१ १८ मे-४,२१,६२०