मेट्रो डबे निर्मितीसाठी सज्जता

: करोनाकाळात ाची चिंता काही अंशी मिटवणारी दिलासादायक बातमी समोर आली आहे. मुंबईसह अन्य शहरांतील मेट्रो वाहतुकीसाठी मेट्रोच्या डब्यांची भविष्यातील मागणी पूर्ण करण्यासाठी मराठवाडा (लातूर) रेल कोच कारखाना सज्ज होत आहे. लातूर रेल्वे कारखान्याचे ९० टक्के काम पूर्ण झाले असून लवकरच डब्यांच्या प्रत्यक्ष बांधणीला सुरुवात होणार आहे. करोनाकाळात सध्या मुंबईसह मुंबई महानगर प्रदेशात उपलब्ध मनुष्यबळाच्या जोरावर मेट्रो प्रकल्पांचे काम सुरू आहे. एकूण १४ मार्गांवर ३५६ किमी लांबीच्या मेट्रो मार्गांसाठी मेट्रो डब्यांची आवश्यकता लक्षात घेता, यापूर्वीच रेल्वे प्रशासनाकडून मेट्रो डब्यांच्या निर्मितीसाठी लातूर रेल्वे कारखान्याला हिरवा कंदील मिळालेला आहे. लातूरस्थित रेल्वे कारखान्यासाठी आतापर्यंत ५३६ कोटी रुपये खर्च झाले आहेत. २०२१-२२ या वर्षांसाठी ६० मेमू (मेनलाइन इलेक्ट्रिक मल्टिपल युनिट) डबे तयार करण्याचे नियोजन आहे. या डब्यांच्या निर्मितीचे काम वर्षाअखेर, अर्थात डिसेंबरपासून सुरू करण्याचे प्रयत्न आहेत, असे मध्य रेल्वेच्या वरिष्ठ रेल्वे अधिकाऱ्यांनी सांगितले. रेल्वे विकास निगम लिमिटेडकडून (आरव्हीएनएल) लातूर एमआयडीसीची जमीन हस्तांतरीत करण्यात आली. लातूर रेल्वे कारखान्याचा सामंजस्य करार झाल्यानंतर दोन वर्षांच्या आत, म्हणजेच डिसेंबर २०२०मध्ये डब्याचे प्रतिरूप (कोच शेल) तयार करण्यात आले होते. वर्षाला २५० रेल्वे डब्यांची निर्मिती क्षमता लातूर रेल्वे कारखान्यामध्ये आहे. सध्या कारखान्याकडे मेमू डब्यांच्या निर्मितीचे काम आहे. मुंबई मेट्रो आणि महामेट्रोकरीता आवश्यक डब्यांसाठी बांधणीपूर्व बोलणी प्रक्रिया सकारात्मकतेने सुरू आहे. ३० लाख रोजगार पूर्ण क्षमतेने बांधणीचे काम सुरू झाल्यानंतर कच्चा माल, त्याची वाहतूक, डबे बांधणी, इलेक्ट्रिक साहित्य, कारखान्यापासून थेट ठिकाणी डबे पोहोचवणे ही संपूर्ण प्रक्रिया लक्षात घेता अंदाजे प्रत्यक्ष आणि अप्रत्यक्षरित्या ३० लाख रोजगार निर्मिती होईल, असा दावा वरिष्ठ रेल्वे अधिकाऱ्यांनी केला आहे. 'आयसीएफ'सोबत स्पर्धा मुंबई रेल्वे विकास महामंडळाच्या एमयूटीपी प्रकल्प '३' मधील ४७ आणि '३ अ' मधील १९१ अशा एकूण २३८ वातानुकूलित लोकल डब्यांची बांधणी करण्यात येणार आहे. या डब्यांच्या निर्मितीसाठी आणि इंटिग्रल कोच फॅक्टरी (आयसीएफ) यांच्यात शर्यत असल्याची माहिती समोर आली आहे.