करोनाच्या तिसऱ्या लाटेची धास्ती; यंदाही गणेशोत्सव साधेपणाने

प्रवीण मुळ्ये, मुंबई करोनाच्या दुसऱ्या लाटेचा उद्रेक, तिसऱ्या लाटेची वर्तवण्यात आलेली शक्यता अशा वातावरणात यंदाचा गणेशोत्सवही अत्यंत साधेपणाने साजरा करण्याची मानसिक तयारी अनेक मंडळांनी केली आहे. मे महिन्याच्या सुरुवातीपासूनच गणेशोत्सवाबाबत अनेक मंडळांमध्ये नियोजन बैठकांचे सत्र सुरू झाले आहे. येत्या काही दिवसांमध्ये या सर्व मंडळांची एकत्रित बैठक घेऊन उत्सवाबाबतची भूमिका गणेशोत्सव समन्वय समितीतर्फे ठरवण्यात येणार आहे. गेल्यावर्षी शेवटच्या क्षणापर्यंत गणेशोत्सवाबाबत भूमिका न घेता राज्य सरकारने जो गोंधळ निर्माण केला तो यावेळी टाळावा यासाठी मूर्तिकारांपासून ते मंडळापर्यंत सर्वांनी आतापासूनच पाठपुरावा सुरू केला आहे. सध्या बहुतांश गणेशोत्सव मंडळांचे कार्यकर्ते हे विरोधातील लढाईत सक्रिय योगदान देत आहेत. तर दुसरीकडे यंदाच्या उत्सवाचे स्वरूप काय? याबाबतची चर्चाही मंडळातील बैठकांमधून सुरू झाली आहे. सध्या करोनाची असलेली बिकट परिस्थिती, भविष्यात येऊ घातलेली तिसरी लाट या सगळ्याचा विचार करता यंदाही उत्सव साधेपणाने साजरा करण्याच्या निर्णयाप्रत अनेक लहान मंडळे आली आहेत. मुंबईत मोठ्या गणेशोत्सव मंडळांनी मात्र आपली भूमिका सध्यातरी जाहीर केलेली नाही. गणेशोत्सवाच्या तयारीसाठी साधारण चार महिन्यांचा अवधी लागतो. पण यंदाचे चित्र पूर्णपणे वेगळे आहे. सर्वच मंडळे ही करोना लढ्यात गुंतली आहेत. त्यामुळे येत्या काही दिवसांमध्ये आम्ही मंडळांचे उत्सवाबाबतचे काय म्हणणे आहे हे जाणून घेऊ. मंडळांची भूमिका योग्यवेळी सर्वांसमोर येईल. पण सरकारनेही फार विलंब न करता उत्सवाबाबतचे आपले धोरण लवकर जाहीर करावे, अशी माहिती बृहन्मुंबई गणेशोत्सव समन्वय समितीचे अध्यक्ष अॅड. नरेश दहिबावकर आणि पदाधिकारी गिरिश वालावलकर यांनी दिली. उत्सव साजरा करण्यासाठी जाहिरातदार, वर्गणीदार मिळवणे ही अडचण मंडळांसमोर असणार आहे. शिवाय विभागातील स्वच्छता, रक्तदान, आरोग्य शिबिरे यातही मंडळांनी मोठी आर्थिक उलाढाल करावी लागली आहे. त्यामुळे यंदा साधेपणातच उत्सव साजरा करण्याकडे मंडळांचा कल दिसून येत आहे. मूर्तिकार संभ्रमात साधारपणे एप्रिलच्या पहिल्या आठवड्यापासून महापालिकेकडून मूर्तिकारांना कारखान्यांच्या जागेसाठी परवानगी देण्यात येते. पण यंदा ही प्रक्रिया सुरू झालेली नाही. मूर्ती घडण्यासाठी आवश्यक असलेली माती, जागा या सगळयाची अडचण आहेच. पण उत्सवाबाबतच धोरण स्पष्ट नसल्यामुळे नेमके काय करावे असा प्रश्न मूर्तिकारांसमोर उभा आहे. गेल्यावर्षीपासून मू्र्तिकार आणि या कलेवर अवलंबून असलेले हजारो कामगार आर्थिक संकटात आहेत. इतर क्षेत्रांप्रमाणेच जगाच्या पाठीवर हा उत्सव घेऊन जाणाऱ्या मूर्तिकलेतील मंडळींनाही आर्थिक मदत देण्याची मागणी पत्राद्वारे राज्याच्या मुख्यमंत्र्यांकडे केल्याची माहिती श्री गणेश मूर्तिकार कामगार संघटनेचे सरचिटणीस सुरेश शर्मा यांनी दिली. यंदाचा उत्सव कशापद्धतीने साजरा करता येईल याविषयी राज्यभरातील मू्र्तिकलेतील तज्ज्ञांशी आमची चर्चा सुरू असून याबाबतचे सादरीकरणही सरकारसमोर करण्याचा विचार असल्याचे शर्मा यांनी स्पष्ट केले.