नवे वर्ष घरांसाठी लाभदायक; मुंबईतील घरांच्या विक्रीचा आकडा पाहाच!

म. टा. विशेष प्रतिनिधी मुंबई : मुंबईत सुरू होण्यापूर्वीपर्यंत मुंबई, पुण्यासह इतर प्रमुख आठ शहरांतील बांधकाम क्षेत्रात तेजीचे चित्र निर्माण झाले. यंदाच्या जानेवारी ते मार्च २०२१ पर्यंत कालावधीत देशातील आठ शहरांतील बांधकाम व्यवसायाचा आढावा घेतल्यास तीन महिन्यात मुंबईने प्रथम, पुण्याने दुसरे तर बंगळुरुने तिसरा क्रमांक पटकाविला आहे. व्याजदर-मुद्रांक शुल्कात कपात, सरकारने लागू केलेल्या योजनांमुळे घरांच्या विक्रीत वाढ झाली. या तीन महिन्यांत देशातील आठही शहरातील एकूण मिळून ७६,००६ एवढी घरे उपलब्ध झाली त्यापैकी तब्बल ७१,९६३ घरांची विक्री झाली आहे. मुंबईत गेल्या वर्षी करोना संसर्गाचा कहर कमी होताना बांधकाम क्षेत्रानेही उभारी घेतली. २०२० च्या दुसऱ्या तिमाहीनंतर परिस्थिती सुधारत गेली असून २०२१च्या जानेवारी ते मार्चच्या पहिल्या तिमाहीत त्यात आणखीनच वाढ झाली. त्यामुळे बांधकाम क्षेत्रातील मंदीचे चित्र बदलल्याचे दिसले. या तीन महिन्यांत ७१ हजार घरांची झालेली विक्री ही २०२०च्या पहिल्या तिमाहीपेक्षा ४४ टक्के अधिक ठरली आहे. त्यात मुंबई, पुण्याने आघाडी घेतली असून त्यापाठोपाठ बंगळुरु, हैद्राबाद आदी शहरांचा समावेश आहे. महाराष्ट्रापाठोपाठ कर्नाटकनेही स्टँप ड्युटीत कपात केल्याने तिथेही घरांची विक्री वाढली आहे. करोनामुळे मोठ्या, स्वतंत्र घरांची मागणी अधिक वाढल्याचे आढळून आले आहे. त्यासाठी पूर्णपणे तयार स्वरुपात वा एखाद वर्षात तयार होणाऱ्या घरांविषयी अधिक उत्सुकता दर्शविली जात आहे. त्यात स्टँप ड्युटी कपातीचीही भर पडल्याचे बांधकाम व्यावसायिकांचे म्हणणे आहे. मात्र, आता महाराष्ट्रात नव्याने निर्बंध लागू केल्याने पुढील कालावधीत बांधकाम क्षेत्रावर त्याचा काय परिणाम होतो, याकडे लक्ष लागले आहे. (स्त्रोत : नाईट फ्रँक रिसर्च)