आपत्कालीन स्थितीत संजय पांडे सुट्टीवर; पोलिसांमध्ये नाराजी

म. टा. खास प्रतिनिधी, मुंबई मुंबईसह महाराष्ट्रावर ओढवलेल्या संकटात प्रत्येक पोलिस जीव धोक्यात घालून लढत असताना राज्याचे पोलिसप्रमुख मात्र सोमवारी सुट्टीवर होते. पोलिस महासंचालक हे खासगी कामानिमित्त चंडीगढला गेले आहेत. संबंधित विभागाकडून रीतसर परवानगी घेऊन ते सुट्टीवर गेल्याचे सांगण्यात येते आहे. मात्र कोकणपासून मुंबईपर्यंत पोलिस प्रशासन झटत असल्याने प्रमुखच आपत्कालीन परिस्थितीत गैरहजर असल्याने पोलिसांमध्ये नाराजी आहे. 'तौक्ते'चा किनारपट्टी परिसराला रविवार, सोमवार आणि मंगळवार फटका बसणार असल्याचा अंदाज हवामान खात्याने व्यक्त केला होता. सिंधुदुर्ग, रत्नागिरी, रायगड, ठाणे, पालघर आणि मुंबईला सतर्कतेचा इशारा देण्यात आला होता. खबरदारी म्हणून अनेक जिल्ह्यांमध्ये समुद्रकिनारी राहणाऱ्या हजारो नागरिकांना सुरक्षितस्थळी हलवण्यात आले. प्रत्येक जिल्ह्यातील वरिष्ठ पोलिस अधिकाऱ्यांसह पोलिस ठाण्यातील प्रत्येकाने वादळादरम्यान मदतकार्यात झोकून दिले होते. अशा आपत्कालीन परिस्थितीमध्ये राज्याच्या पोलिसप्रमुखाची भूमिकादेखील महत्त्वाची असते. असे असताना पोलिस महासंचालक सुट्टीवर होते. मनोबल वाढवणे गरजेचे पोलिस दलातील सूत्रांनी दिलेल्या माहितीनुसार, संजय पांडे यांनी दोन दिवस सुट्टीवर जाण्याची रीतसर परवानगी घेतली होती. याबाबत नेमकी माहिती घेण्यासाठी पांडे यांना संपर्क करण्याचा प्रयत्न केला. मात्र त्यांचा प्रतिसाद मिळाला नाही. सुट्टीसाठी परवानगी घेतली असली तरी अशा कठीण समयी आपले पोलिस झटत असताना महासंचालकांनी त्यांना मार्गदर्शन करणे, त्यांचे मनोबल वाढवणे गरजेचे असताना त्यांनी सुट्टीवर जाणे योग्य नाही, अशा प्रतिक्रिया पोलिस दलातून उमटत आहेत.