तौक्ते चक्रीवादळाच्या तडाख्यात मुंबई विमानतळ ११ तास ठप्प

म. टा. प्रतिनिधी, मुंबई तौक्ते चक्रीवादळाच्या तडाख्यात छत्रपती शिवाजी महाराज आंतरराष्ट्रीय विमानतळ ११ तास पूर्णपणे ठप्प राहिले. सकाळी ११ वाजता विमानतळावरील उड्डाणे बंद करण्यात आली. ती रात्री १०पर्यंत सुरू झालेली नव्हती. यादरम्यान सात विमानांना अन्यत्र वळवावे लागले. या चक्रीवादळाचा मुंबईला धोका होणार नसल्याचा दावा करण्यात आला होता. प्रत्यक्षात वादळ मुंबईजवळील समुद्रातून जाताना त्याचा जोरदार तडाखा बसला. वादळाचे रौद्ररूप बघता मुंबई आंतरराष्ट्रीय विमानतळ लिमिटेडच्या प्रशासनाने सुरुवातीला सकाळी ११ ते दुपारी २ दरम्यान विमानसेवा बंद केल्या. पण वादळाची तीव्रता कमी होत नव्हती. वारे जोरदार सुरूच होते. त्यामुळे त्यानंतर ही वेळ दुपारी ४, सायंकाळी ६ व सायंकाळी ८ पर्यंत वाढवण्यात आली. रात्रीदेखील पाऊस पडतच होता. त्यामुळे पुन्हा रात्री १० वाजतापर्यंत सर्व उड्डाणे बंद राहतील, असे विमानतळाने घोषित केले. विमानतळ प्रशासनाने दिलेल्या माहितीनुसार, अनेक विमानसेवा कंपन्यांनी वादळी स्थिती पाहून नियमित उड्डाणे आधीच रद्द केली होती. तर कंपन्यांनी स्वत:हून सेवा स्थगित न केल्याने उड्डाण बंद काळात ३४ येणारी व २२ जाणारी विमाने रद्द करण्यात आली. सात विमानांना अहमदाबाद, सुरत व हैदराबादकडे वळविण्यात आले. लखनऊनहून आलेल्या विमानाला मुंबईच्या आकाशात प्रवेश करताच माघारी पाठवावे लागले.