करोनाच्या तिसऱ्या लाटेची सज्जता; बालरोगतज्ज्ञांना 'हे' प्रशिक्षण देण्यात येणार

‌म. टा. विशेष प्रतिनिधी, मुंबई संसर्गाची तिसरी लाट आल्यास, त्यात मुलांना सर्वाधिक संसर्ग होण्याची शक्यता वैद्यकीय तज्ज्ञांनी व्यक्त केली आहे. तीव्र स्वरूपाची लक्षणे असलेल्या मुलांना आयसीयूमध्ये ठेवण्याची गरज भासू शकते. त्यामुळे राज्यातील बालरोगतज्ज्ञांना त्यादृष्टीने प्रशिक्षण देण्यात येणार आहे. सहा ते आठ हजार इतक्या वैद्यकीय तज्ज्ञांना हे प्रशिक्षण देण्यात येणार आहे. मागील अनेक वर्षांपासून राज्यामध्ये डॉक्टरांच्या उपलब्धतेचा प्रश्न गंभीर झाला आहे. दुसऱ्या लाटेच्या वेळी पुरेशी तयारी नसलेल्या वैद्यकीय यंत्रणेला कोणत्याही प्रकारचा धोका लहान मुलांच्या बाबतीत घ्यायचा नाही. त्यामुळे मुलांना सुरक्षित ठेवण्यासाठी काय करता येईल, याची वैद्यकीय पूर्वतयारी सुरू करण्यात आली आहे. यासंदर्भात राज्याने तयार केलेल्या टास्क फोर्सचे प्रमुख डॉ. सुहास प्रभू यांनी डॉक्टर एका दिवसांत तयार होत नाहीत. आयसीयूमध्ये बालरोगतज्ज्ञांचा तुटवडा भासू शकतो. मुलांना संसर्गाची लागण झाल्यास डॉक्टरांची अनुपलब्धता असू नये, यादृष्टीने वैद्यकीय नियोजन करण्यात येत आहे. आयसीयूमध्ये काम करण्यासाठी डॉक्टरांना प्रशिक्षण देण्यात येणार आहे. ज्या डॉक्टरांना यापूर्वी अतिदक्षता विभागात घेतलेले नाही, त्या डॉक्टरांनाही त्यादृष्टीने प्रशिक्षण देण्यात येणार आहे. सौम्य, मध्यम आणि तीव्र स्वरूपाच्या रुग्णांना कशाप्रकारे वैद्यकीय उपचार द्यावेत यासाठी विशेष प्रशिक्षण अभ्यास तयार करण्यात आला आहे. बालरोगतज्ज्ञांच्या टास्क फोर्सने विशेष नियमावली तयार केली असून, त्यात दिलेल्या मार्गदर्शक सूचनांनुसार नियमावली तयार करण्यात आली आहे. शहरी आणि ग्रामीण भागामध्ये आयसीयूतज्ज्ञांचा तुटवडा आहे. त्यामुळे लहान मुलांना संसर्ग झाल्यास त्यांना कशा प्रकारे वैद्यकीय उपचार द्यावेत याची पूर्वतयारी या प्रशिक्षणादरम्यान करण्यात येणार असल्याचे टास्क फोर्स समितीच्या सदस्यांनी सांगितले. करोना काळामध्ये रुग्णांना शोधण्यासाठी तसेच लोकप्रबोधनासह विविध प्रकारची करोनाशी निगडित कामे करण्यासाठी अंगणवाडी सेविकांचीही मदत घेण्यात आली होती. ग्रामीण भागामध्ये जनजागृती करण्यासह मुलांच्या पोषण आहार, उंची, वजन घेणे, संसर्गाची लागण झालेल्या मुलांची माहिती देण्याच्या कामासाठी अंगणवाडी सेविका महत्त्वाची भूमिका बजावतील, असा सरकारला विश्वास आहे. त्यामुळे त्यांची मदतही मुलांना करोनाचा संसर्ग होऊ नये याासठी घेण्यात येणार आहे. लसीकरण चुकवू नका! लहान मुलांना वयाच्या वेगवेगळ्या टप्प्यांवर जे लसीकरण केले जाते, त्यामधील एकही डोस चुकवू नका. लसीकरण व्यवस्थित करा, असे निर्देश सरकारने बालरोगतज्ज्ञांच्या बैठकीमध्ये दिले आहेत. शहरातील बालरोगतज्ज्ञांनी त्यांच्याकडे येणाऱ्या बाळांच्या पालकांनाही ही माहिती सांगितली आहे.