तौक्ते चक्रीवादळाची तीव्रता राहणार कायम; आदित्य ठाकरेंनी केले 'हे' आवाहन

म. टा. विशेष प्रतिनिधी, मुंबई तौक्ते चक्रीवादळाचा फटका कोकण किनारपट्टीसह मुंबई शहर आणि उपनगरांमध्येही बसला. मुंबईतील हिंदमाता आणि अन्य सखल भागांत मोठ्या प्रमाणात पाणी साचले, तर अनेक भागात झाडे उन्मळून पडली. पर्यावरणमंत्री यांनी सोमवारी मुंबई महापालिकेच्या नियंत्रण कक्षात जाऊन मुंबईतील परिस्थितीचा आढावा घेतला. वादळाची तीव्रता संध्याकाळ किंवा रात्रीपर्यंत कायम राहण्याची शक्यता आहे. त्यामुळे मुंबईकरांनो विनाकारण घराबाहेर पडू नका, असे आवाहनही आदित्य यांनी केले. वादळाची दिशा गुजरातकडे आहे, वाऱ्याचा वेग प्रचंड आहे, सखल भागांत पाणी साचले आहे, जम्बो सेंटर्सच्या देखभालीची कामे सुरू आहेत. रात्रीपर्यंत ही परिस्थिती अशीच राहील, विनाकारण घराबाहेर पडू नका. हे वादळ आहे. मुंबईत कधीही न झालेले वारे आपण पाहत आहोत, अशी प्रतिक्रिया आदित्य यांनी दिली. वादळ आणि वाऱ्यासह १६० मिमी, १२० मिमी पाऊस पडत आहे. मनुष्यहानी होणार नाही, याची काळजी घेत आहोत. हायटाइड आहे, ती निघून जाईल. पण त्यानंतरही खबरदारी घ्यावी लागेल. कधीही न पाहिलेले चक्रीवादळ मुंबई आता पाहत असल्याचे ते म्हणाले.