'तौक्ते'नंतर राजकीय वादळ; राष्ट्रवादी पक्षाची 'ही' मागणी मुख्यमंत्र्यांकडून नामंजूर

म. टा. विशेष प्रतिनिधी, मुंबई तौक्ते चक्रीवादळाचा राज्याला एकीकडे हादरा बसत असताना, आता सत्ताधारी महाराष्ट्र विकास आघाडीलाही अंतर्गत वादाचे हादरे बसू लागले आहेत. राष्ट्रवादी काँग्रेसकडे असलेल्या जलसंपदा विभागाच्या सचिव दर्जाच्या अधिकाऱ्याला मुदतवाढ देण्याबाबतच मागणी राष्ट्रवादीने केली होती. मात्र मुख्यमंत्री यांनी संबंधित फाइलवर मुदतवाढ देता येणार नसल्याचा शेरा मारल्याने हा शेरा बदलावा, असा आग्रह राष्ट्रवादीच्या मंत्र्यांनी धरल्याचे समजते. मुख्य सचिवांनाच बदला जलसंपदा मंत्री यांनी त्यांच्या विभागाच्या सचिव दर्जाच्या अधिकारी सेवानिवृत्त होत असल्याने त्याला मुदतवाढ देण्याबाबतची मागणी केली होती. मात्र संबंधित अधिकाऱ्याची अनियमिततेबाबत चौकशी सुरू असल्याने त्याला मुदतवाढ देता येणार नसल्याची भूमिका मुख्य सचिव सिताराम कुंटे यांनी घेतल्याचे कळते. त्यांच्या या भूमिकेला मुख्यमंत्र्यांचे अतिरिक्त मुख्य सचिव आशीषकुमार सिंग तसेच अजोय मेहता या अधिकाऱ्यांनीही पाठिंबा दर्शविला. त्यावर सिताराम कुंटे यांनाच बदलून त्यांच्या ठिकाणी प्रवीण परदेशी यांची नियुक्ती करण्याबाबतची भूमिका जयंत पाटील यांनी मंत्रिमंडळाच्या बैठकीतच मांडली. विशेष म्हणजे उप मुख्यमंत्री अजित पवार यांनी देखील ही भूमिका उचलून धरली. दरम्यान जलसंपदा विभागाच्या अधिकाऱ्याला मुदतवाढ देण्याबाबतची फाइल जयंत पाटील यांनी मुख्यमंत्र्यांकडे पाठवली, मात्र संबंधित अधिकाऱ्याची चौकशी सुरू असल्याने त्याला मुदतवाढ देण्यात येणार नसल्याचे स्पष्ट करीत मुख्यमंत्र्यांनी फाईलवर नकारात्मक शेरा दिला. यामुळे उप मुख्यमंत्री अजित पवार तसेच जलसंपदा मंत्री जयंत पाटील यांनी उघडपणे नाराजी व्यक्त करायला सुरूवात केली आहे. नागपूर समुद्धी महामार्गाचे व्यवस्थापकीय संचालयक राधेश्याम मोपलवर यांच्यापासून ते इतर अनेक अधिकाऱ्यांच्या चौकशा सुरू असताना त्यांना मुदतवाढ मिळू शकते, तर या अधिकाऱ्याला का नाही असा पवित्रा घेत हे प्रकरण लावून धरण्यात आले आहे. तुमचे ५४ तर आमचे ५६ शिवसेनेचे ५६ आमदार असतील तर राष्ट्रवादीचेही ५४ आमदार आहेत, जास्तीच्या दोन आमदारांच्या जिवावर शिवसेनेने जास्त उड्या मारू नयेत असा इशारा देताना तो मुख्यमंत्री ठाकरे यांच्यापर्यंत कसा पोहोचेल याची व्यवस्थाही उपमुख्यमंत्री अजित पवार यांनी केल्याचे कळते. राष्ट्रवादीच्या या इशाऱ्यावर मुख्यमंत्री ठाकरे नेमकी काय भूमिका घेणार आहेत हे अद्याप गुलदस्त्यात आहे. मुख्यमंत्र्यांविरोधात मोर्चेबांधणी. . . बुधवारी होणाऱ्या मंत्रिमंडळाच्या बैठकीत मुख्यमंत्री ठाकरे यांच्या कारभारावर उघडपणे नाराजी व्यक्त करण्यासाठी राष्ट्रवादीच्या मंत्र्यांनी मोर्चेबांधणी केली असून त्याचे नेतृत्व जयंत पाटील करणार असल्याचे खात्रिलायकरित्या समजते.