'त्या' ब्रिटिश बनावटीच्या पुलांचा प्रश्न अखेर मार्गी

म. टा. प्रतिनिधी, अनेक वर्षांपासून रखडलेल्या व आयुर्मान पूर्ण झालेल्या ब्रिटिश बनावटीच्या पुलांचा प्रश्न अखेर मार्गी लागला आहे. महाराष्ट्र रेल्वे इन्फ्रास्ट्रक्चर डेव्हलपमेंट कॉर्पोरेशनकडून (एमआरआयडीसी) आणि रे रोड पुलांच्या पुनर्बांधणीचे काम हाती घेण्यात आले आहे. मध्य रेल्वे, पश्चिम रेल्वे आणि आयआयटी संस्थेमार्फत केलेल्या संरचनात्मक सर्वेक्षणाच्या अहवालात शहरातील आयुर्मान पूर्ण झालेल्या पुलांची पुनर्बांधणी करण्याची शिफारस करण्यात आली होती. शहरातील प्रमुख पूल असलेला दादर टिळक पूल १९२५मध्ये उभारण्यात आला होता. या पुलाला ९६ वर्षे पूर्ण झाली आहेत. रे रोड पुलाने शंभरी ओलांडली असून हा पूल १९२० मध्ये बांधण्यात आला होता. मुंबईत ब्रिटिश बनावटीच्या एकूण १२ पुलांचा आजही वापर होत आहेत. यात भायखळा, आर्थर रोड, माझगाव (ओलिव्हेंट), मुंबई सेंट्रल (बेलासिस), गार्डन एस पूल, करी रोड, महालक्ष्मी या पुलांचा समावेश आहे. यापैकी सर्वात जूना अर्थात, १३४ वर्षे जुना पूल म्हणून ओलिव्हेंट पूल ओळखला जातो. सध्या २ पुलांसाठी मंजुरी मिळाली असून उर्वरित १० पुलांसाठी परवानगी बाकी आहे. दादर टिळक आणि रे रोड पुलाच्या उभारणीसाठी मुंबई महापालिकेकडून परवानगी प्राप्त झाली आहे. हे पूल पाडून त्या ठिकाणी नवीन पूल उभारण्यात येतील. यासाठी पाडकाम करण्यापूर्वी कागदोपत्री सर्व प्रक्रिया पूर्ण करण्यात आली असून दोन्ही पुलांचे जिओ टेक्निकलचे काम सुरू करण्यात आले आहे, असे एमआरआयडीसीतील अधिकाऱ्यांनी सांगितले. करोना काळातील कडक निर्बंधाच्या काळात अनेक मजूर मूळ गावी गेल्याने पूल दुरुस्तीसह अन्य बांधकामांवर परिणाम होत आहे. त्यातच कार्यालयात १५ टक्के मनुष्यबळाचे निर्बंध आहे. यामुळेही अनेक कामांवर याचा परिणाम होत आहे. दादर टिळक पूल : १९२५ दादर पूर्व आणि पश्चिमेला जोडणारा हा महत्त्वाचा पूल असल्याने त्यावर २४ तास जड वाहनांसह मोटार कारची प्रचंड वर्दळ असते. नवीन टिळक पुलाची एकूण रुंदी १७.१ तर लांबी साधारणपणे ४०० मीटर असेल. वांद्रे-कुर्ला सी लिंकच्या धर्तीवर केबल आधारित हा पूल आहे. त्यासाठी सुमारे ३५० कोटींचा खर्च अपेक्षित आहे. हा पूल तीन वर्षांत उभारण्यात येईल. रे रोड पूल : १९२० रे रोड नवीन पुलाची लांबी २८० मीटर आणि रुंदी १२ मीटर असणार आहे. या पुलाच्या निर्मितीसाठी १४२ कोटींचा खर्च अपेक्षित आहे. या पुलालादेखील केबलचा आधार असेल. सध्या पुलावर असलेल्या वीज, फोन आणि अन्य जड केबल नवीन नंतर भूमिगत करण्यात येतील. दोन वर्षांत पुलाचे काम पूर्ण करण्यात येणार आहे. प्राधान्यक्रमानुसार काम आयुर्मान पूर्ण झालेल्या पुलांचे कामे एकाच वेळी करणे शक्य नसल्याने पुलांची प्राथमिकता ठरवण्यात आली. पहिल्या टप्प्यात सहा पुलांची दुरुस्ती करण्यात येणार असून त्यापैकी दादर आणि रे रोड पुलांच्या सर्वसाधारण आराखड्यास (जीएडी) मंजुरी देण्यात आली आहे. तीन वर्षांत पुलांचे पुनर्बांधकाम पूर्ण करण्यात येईल. यासाठी २०२०-२१ आर्थिक वर्षात १० कोटी आणि २०२१-२२ आर्थिक वर्षात २०० कोटींची अर्थसंकल्पी तरतूद करण्यात आल्याचे महापालिका अधिकाऱ्यांनी सांगितले.