करोनाविरुद्व लढ्यात इंडियन ऑइलचा पुढाकार; रुग्णालयांना ऑक्सिजन पुरवणार

म. टा. प्रतिनिधी, मुंबई करोनाविरुद्व लढ्यात संपूर्ण देश योगदान देत आहे. त्यामध्येच सरकारी तेल कंपनी इंडियन ऑइलनेदेखील पुढाकार घेतला आहे. तेल शुद्धीकरण प्रकल्पातून ऑक्सिजनचा पुरवठा करण्यासह कंपनीने विविध आघाड्यांवर काम सुरू केले आहे. इंडियन ऑइलकडून लॉकडाउन असलेल्या राज्यांत अत्यावश्यक सेवेतील रस्त्यावरची सर्व वाहने, रेल्वे, संरक्षण दलाची वाहने आणि अन्य ग्राहकांना इंधन पुरवठा करण्याचे काम सुरू आहे. त्यामध्येच पानिपतच्या तेल शुद्धीकरण प्रकल्पातून विनाशुल्क करण्यात येत आहे. दिल्ली, हरयाणा व पंजाबमधल्या रुग्णालयांना प्रतिदिन ३०० मेट्रिक टन ऑक्सिजन उपलब्ध करून देण्यात येत आहे, अशी माहिती कंपनीचे कार्यकारी संचालक (प्रादेशिक सेवा) सिद्धार्थ बोस यांनी 'जागतिक परिचारिका दिवसा'च्या निमित्ताने दिली. कंपनीचे कर्मचारी, कंत्राटी कामगार आणि भागीदारांना नामांकित रुग्णालयांमध्ये उपचारांची सोय करून देण्यात आली आहे. इंडियन ऑइलचे अध्यक्ष एस. एम. वैद्य यांनी करोना समन्वय केंद्र सुरू करण्याचे महत्त्वाचे पाऊल उचलले आहे. २१ ठिकाणी असणारी ही केंद्रे '२४ बाय ७' सेवा देत आहेत. कर्मचाऱ्यांना डॉक्टर, रुग्णालये, औषधे, रुग्णवाहिका कुठे उपलब्ध आहेत, याचीही माहिती दिली जात आहे. करोना संसर्ग होणाऱ्या कर्मचाऱ्यांना योग्य वेळी योग्य मार्गदर्शन आणि उपचार मिळण्याची सोयदेखील कंपनीकडून केली जात आहे. यात डॉक्टर, नर्सेस आणि आरोग्य कर्मचारी फार महत्त्वाची भूमिका निभावत आहेत. ते कंपनीच्या कर्मचारी आणि कंत्राटी कामगारांची आरटी-पीसीआर/अॅण्टिजेन चाचणी करून उपचार आणि लसीकरण करत आहेत. इंडियन ऑइलचे पेट्रोल पंप कर्मचारी, गॅस सिलिंडर डिलिव्हरी मॅन जोखीम घेऊन काम करीत आहेत. ग्राहकांनीसुद्धा मास्क घालून, सुरक्षित अंतर राखून आणि आरोग्य नियमांची पालन करून त्यांना सहकार्य करावे, असे आवाहन बोस यांनी केले आहे.