संजय राऊतांनी घेतली शरद पवारांची भेट, राजकीय वर्तुळात चर्चांना उधाण

मुंबई : शिवसेना खासदार संजय राऊत यांनी राष्ट्रवादीचे सर्वेसर्वा शरद पवार यांनी भेट घेतली आहे. मुंबईतल्या शरद पवार यांच्या सिल्व्हर ओक या निवासस्थानी जाऊन राऊतांनी पवारांची भेट घेतली. या दोन्ही नेत्यांमध्ये तासभर चर्चा झाली असल्याची माहिती देण्यात आली आहे. खरंतर, दोन यशस्वी शस्त्रक्रिया झाल्यानंतर राष्ट्रवादी काँग्रेसचे अध्यक्ष शरद पवार यांची प्रकृती आता उत्तम असून ते पुन्हा एकदा सक्रिय झाले आहेत. त्यांच्याच प्रकृतीची विचारपूस करण्यासाठी संजय राऊत गेले असल्याचं सांगण्यात येत आहे. यावेळी दोन्ही नेत्यांमध्ये राजकीय चर्चा झाल्याचंही समोर येत आहे. राज्यात एकीकडे करोनाचा धोका मोठ्या प्रमाणात वाढत आहे. यामुळे लॉकडाऊन आणि लसीकरण असे महत्त्वाचे मुद्दे असताना दुसरीकडे मराठा आरक्षणावरून राजकीय वातावरण तापलं आहे. त्यामुळे या मुद्द्यांवर दोन्ही नेत्यांमध्ये चर्चा झाली असावी असा अंदाज वर्तवण्यात येत आहे. शरद पवार यांच्या प्रकृतीबद्दल अनेक बातम्या माध्यमांमध्ये पसरत होत्या. पण ते आता बरे असल्याचंही सांगण्यात येत आहे. इतकंच नाहीतर काल शरद पवार यांनी आजारपणातून बाहेर येत पुन्हा काम करण्यास सुरुवात केली आहे. शुक्रवारी त्यांनी हॉटेल व्यावसायिक आणि आदरातिथ्य क्षेत्रातील समस्या मांडत मुख्यमंत्री उद्धव ठाकरे यांना पत्र लिहलं होतं. कोविड १९ या जागतिक महामारीच्या दुसऱ्या लाटेनं महाराष्ट्रात चिंताजनक परिस्थिती निर्माण झाली आहे. करोना संक्रमणाची साखळी तोडायची असल्यानं पुनश्च संचारबंदीचा निर्णय राज्य शासनाला घ्यावा लागला. याचा परिणाम अनेक व्यवसाय-धंद्यांवर झाला असून हा वर्ग आर्थिक संकटात सापडला आहे. या वर्गाच्या सर्वच समस्यांच्या निराकरण करणं सध्या अभूतपूर्व अशा परिस्थितीत जिकीरीचं असलं तरी काही मागण्यांबाबत विचार व्हावा अशी विनंती शरद पवार यांनी मुख्यमंत्र्यांना पाठवलेल्या पत्रात केली होती.