मुंबईत ऑक्सिजनचा काळाबाजार; साकीनाका येथील गोदामामध्ये पोलिसांचा छापा

म. टा. खास प्रतिनिधी, मुंबई करोनाच्या संकटात मास्क, सॅनिटायझर, इंजेक्शननंतर आता रुग्णांचे प्राण वाचविण्यास महत्त्वाची भूमिका बजावणाऱ्या ऑक्सिजनच्या सिलिंडरची साठेबाजी केली जात असल्याचे समोर आले आहे. मुंबई पोलिसांच्या गुन्हे शाखेच्या पथकाने साकीनाका परिसरात एका गोदामावर छापा टाकून ऑक्सिजनचे ३१हून अधिक सिलिंडर हस्तगत केले. याप्रकरणी दोघांना अटक करण्यात आली आणखी आरोपींचा समावेश असण्याची शक्यता पोलिसांनी व्यक्त केली आहे. साकीनाका येथील काजूपाडा परिसरातील एका कपड्यांच्या गोदामामध्ये ऑक्सिजन सिलिंडरचा साठा करून त्याची जास्त किंमतीला विक्री केली जात असल्याची माहिती गुन्हे शाखा युनिट १०ला मिळाली. या माहितीच्या आधारे युनिट १०चे सहाय्यक पोलिस निरीक्षक चौधरी यांच्या पथकाने या गोदामामध्ये छापा टाकून एकाला ताब्यात घेतले. झाडाझडतीमध्ये या तरुणाकडे १० आणि ५ ऑक्सिजन सिलिंडर किट जप्त केले. त्याची अधिक चौकशी केली असता त्याचा आणखी एक साथीदार असल्याचे समजले. पोलिसांनी त्यालाही शोधून काढले. त्याच्याकडून पोलिसांनी आणखी ऑक्सिजनचे आणखी २१ सिलिंडर हस्तगत केले. हे दोघे अॅक्सिजन सिलिंडर कुठे भरायचे? त्यांनी किती जणांना विक्री केली आहे, याचा तपास पोलिस करीत आहेत. जप्त करण्यात आलेल्या सिलिंडरची किंमत २ लाख ८५ हजार इतकी असल्याची माहिती पोलिसांनी दिली. ऑक्सिजनचा तुटवडा भासू लागल्यापासून हे दोघे सिलिंडरचा काळाबाजार करीत होते, अशी माहिती पोलिसांना मिळाली आहे. अनेक गरजू रुग्ण आणि त्यांच्या नातेवाईकांनी या दोघांकडून चढ्या दराने ऑक्सिजन सिलिंडर खरेदी केल्याने पोलिस साक्षीदार म्हणून या सर्वांनाही बोलविण्याची शक्यता आहे.