केरळमध्ये मान्सून ३१ मे रोजी येणार

म. टा. विशेष प्रतिनिधी, मुंबई भारतीय हवामान विभागाने मॉडेल्सच्या आधारे १ जून रोजी मान्सून केरळमध्ये दाखल होईल अशी शक्यता गेल्या आठवड्यामध्ये वर्तवली होती. त्यानंतर या आठवड्यात भारतीय हवामान विभागाने या शक्यतेवर शुक्रवारी शिक्कामार्तब करत यंदा मान्सून ३१ मे रोजी केरळमध्ये दाखल होईल असे स्पष्ट केले आहे. हवामान विभागाने वर्तवलेल्या या अंदाजानंतर भारतीयांमध्ये मान्सून आमगनाची उत्सुकता निर्माण झाली आहे. वर्षभर अवेळी अनुभवला असला तरी भारतासाठी मान्सून आगमन आणि परतीचा पाऊस या दोन्ही घटना तितक्याच महत्त्वाच्या असतात. यंदा गेल्या वर्षापेक्षा एक दिवस आधीच मान्सून दाखल होण्याची शक्यता आहे. गेल्या वर्षी १ जूनला मान्सून केरळात दाखल झाला होता. २०१७ आणि २०१८मध्येही मेच्या अखेरीस मान्सून आगमन झाले होते. अंदमान-केरळ संबंध नाही मान्सूनच्या बदललेल्या चक्रानुसार आता अंदमानच्या समुद्रामध्ये मान्सून २२ मेपर्यंत दाखल होऊ शकतो. चक्रीवादळाच्या स्थितीमुळे सध्या अरबी समुद्रावरील वारे अधिक तीव्र झाले आहेत. २० मेच्या सुमारास बंगालच्या उपसागरावरील वारे तीव्र होतील. त्यानंतर २१ मे रोजी बंगालच्या उपसागराचा दक्षिण भाग, अंदमान, निकोबार येथे सातत्यपूर्ण पाऊस पडेल. त्यामुळे २१ मे रोजी मान्सून या भागात दाखल होण्याची शक्यता वर्तवण्यात आली आहे. मात्र अंदमान येथे मान्सून दाखल होणे आणि केरळमध्ये मान्सून दाखल होणे यांचा थेट संबंध नाही, हे आत्तापर्यंत समोर आले आहे.