मुंबईकरांच्या जीवाशी खेळ; लॅबचालकाकडून दोन हजारांत बनावट 'निगेटिव्ह रिपोर्ट'

म. टा. खास प्रतिनिधी : करोनाचा संसर्ग एकीकडे वाढत असताना दुसरीकडे बोगस निगेटिव्ह अहवाल देऊन नागरिकांच्या जिवाशी खेळ सुरू असल्याचा धक्कादायक प्रकार पोलिसांनी उघडकीस आणला आहे. कोणतेही स्वॅब न घेता केवळ दोन हजार रुपयांत निगेटिव्ह रिपोर्ट देणाऱ्या काळाचौकी येथील लॅबचालकाला पोलिसांनी अटक केली आहे. काळाचौकी परिसरातील स्वामी पॅथॉलॉजी लॅबॉरटरीजमध्ये पैसे देऊन करोनाचा निगेटिव्ह अहवाल दिला जात असल्याची माहिती गुन्हे नियंत्रण कक्षाला मिळाली. प्रभारी पोलिस निरीक्षक नितीन पाटील यांच्या मार्गदर्शनाखाली पथकाने लॅबवर छापा टाकला. लॅबमध्ये एका कम्प्युटरवर करोनाचे अहवाल तयार केले जात असल्याचे दिसून आले. ज्या नागरिकांचे अहवाल तयार करण्यात आले होते, त्यांच्या स्वॅबबाबत विचारले असता, कोणत्याही प्रकारचे स्वॅब घेण्यात आले नसल्याचे आढळले. बोगस काम सुरू असल्याचे लक्षात येताच लॅबचा चालक विद्याधर आंबोणकर याला पोलिसांनी अटक केली. दररोज आठ ते दहा अहवाल स्वामी पॅथॅलॉजी लॅबमधून पोलिसांनी मोबाइल, कम्प्युटर, प्रिंटर्स, बनावट करोना अहवाल तसेच इतर साहित्य हस्तगत केले. या लॅबमधून दिवसाला ८ ते १० अहवाल दिले जात होते. महिनाभराहून अधिक काळ आंबोणकर याचा हा धंदा सुरू होता. त्यामुळे त्याने जवळपास तीनशे ते चारशे बनावट करोना अहवाल दिल्याची शक्यता व्यक्त करण्यात येत आहे. अहवाल घेणाऱ्यांचाही शोध या लॅबमधून करोनाचे निगेटिव्ह अहवाल घेणाऱ्यांचा शोध घेण्याचा प्रयत्न सुरू असल्याचे पोलिसांनी म्हटले आहे. खासगी कार्यालयात काम करण्यासाठी अथवा प्रवासासाठी असा अहवाल घेणाऱ्यांची संख्या अधिक असल्याचे म्हटले जात आहे. मात्र यामध्ये खरेच कुणी लक्षणे अथवा करोना विषाणूची लागण झालेला असल्यास त्याच्याकडून संसर्ग होण्याची भीती आहे.