मुंबईमध्ये मे महिन्यातील सर्वाधिक पावसाची नोंद

म. टा. विशेष प्रतिनिधी, मुंबई पूर्व किनारपट्टीप्रमाणे आता पश्चिम किनारपट्टीलाही चक्रीवादळासाठी सज्ज व्हावे लागणार आहे अशी चर्चा सोमवारी अनुभवलेल्या तौक्तेच्या कहरानंतर मुंबईकरांमध्ये होती. रविवारी रात्री उशिरापासून अधून मधून वाऱ्याचा वाढलेला वेग मुंबईकरांना अनुभवायला येत होता. पावसानेही उपस्थिती लावली होती. मात्र पावसाचे प्रमाण आणि वाऱ्याचा वेग सोमवारी सकाळनंतर वाढायला सुरुवात झाली. हवामान विभागाने दिलेल्या माहितीनुसार, कुलाबा येथे १०८ किलोमीटर वेगाने वारे वाहिले. परिणामी दक्षिण मुंबईमध्ये अनेक ठिकाणी पत्रे उडून जाणे, झाडे कोसळणे असे प्रकार घडले. मुंबईच्या पूर्व उपनगरांपेक्षा पश्चिम उपनगरांना वारे आणि पावसाचा अधिक फटका बसला. मुंबईमध्ये कुलाबा येथे सोमवारी सकाळी ८.३० ते ५.३० या वेळेत १८९ मिलीमीटर पाऊस पडला. संध्याकाळी ५.३० वाजता झालेल्या नोंदीनुसार कुलाबा येथे ९० टक्के आर्द्रता होती. तर, सांताक्रूझ येथे सकाळी ८.३० ते ५.३० या वेळेत १९४ मिलीमीटर पाऊस पडला. सांताक्रूझ येथे ८७ टक्के आर्द्रता होती. चक्रीवादळ गुजरातच्या दिशेने सरकल्यानंतर मुंबईमध्ये संध्याकाळी वारे आणि पावसाचा जोर कमी झाला. मात्र रात्री उशिरापर्यंत मुंबईमध्ये पावसाने थोडी उसंत घेतली तरी वाऱ्यांची उपस्थिती कायम होती. मुंबईमध्ये सोमवारी पडलेला पाऊस हा मे महिन्यातील आत्तापर्यंत उपलब्ध नोंदीनुसार सर्वाधिक पाऊस होता. या आधी २४ तासांमध्ये १९०.८ मिलीमीटर पावसाची मे महिन्यामध्ये नोंद झाली होती. गेल्या १० वर्षांमध्ये मे महिन्यात केवळ शिडकावा नोंदला गेला आहे. त्यामुळे या अनुभवाबद्दल अनेकांच्या मनात धास्ती निर्माण झाली होती. वाऱ्यामुळे खिडक्या आपटणे, झाडांच्या फांद्यांचे थैमान, ठिकठिकाणी उन्मळून पडलेली झाडे, काही ठिकाणी वाऱ्याच्या वेगाने उडून आलेले पत्रे, काही कच्ची घरे कोसळण्याचे प्रकार, उतारावरील घरांमध्ये वाहून आलेली माती असा प्रकार दिवसभर काही जणांनी अनुभवला. या वारा आणि पावसामध्ये ४७९ ठिकाणी झाडे किंवा फांद्या पडल्याचे महापालिका प्रशासनाने म्हटले असले तरी रस्तोरस्ती फांद्या आणि मोठी झाडे उन्मळून पडल्याने या दिलेल्या आकडेवारीपेक्षाही अधिक झाडे पडल्याची शक्यताही मुंबईकरांनी वर्तवली. महापालिकेच्या नोंदीनुसार डी विभागामध्ये सर्वाधिक म्हणजे २२९ मिमी झाली. त्या खालोखाल वरळी आणि जी दक्षिणमध्ये २१६ मिमी, एच पूर्व येथे २४२ मिमी पाऊस नोंदला गेला. दिवसभरात सर्वांत कमी पाऊस एस विभागामध्ये ७७ मिमी होता. महापालिकेच्या नोंदीनुसार कुलाबा पंपिंग स्टेशन येथे वाऱ्याचा वेग सर्वाधिक ११४ किमी होता. ब्रिटानिया पंपिंग स्टेशन येथे ९९, मनपा मुख्यालय येथे ८४ किमी, मरिन लाइन्स येथे ७७ किमी वेगाची नोंद झाली. तापमानात घट वारे आणि पावसाच्या पार्श्वभूमीवर मुंबईमध्ये सोमवारी किमान आणि कमाल तापमानात केवळ २.५ अंश सेल्सिअसचा फरक असल्याचे आढळून आले. तसेच हवेची गुणवत्ता सुधारून मध्यम श्रेणीतून पुन्हा समाधानकारक श्रेणी सोमवारी नोंदली गेली. सोमवारी कुलाबा येथे कमाल तापमान २७.४, तर किमान तापमान २५.० अंश सेल्सिअस होते. सांताक्रूझ येथे सोमवारी कमाल तापमान २६.९, तर किमान तापमान २४.८ अंश सेल्सिअस होते.