चक्रीवादळामुळे मुंबईत आज लसीकरण नाही

म. टा. विशेष प्रतिनिधी, करोनावरील लशींचा अपुरा साठा हा मुंबईकरांसाठी डोकेदुखीचा विषय ठरला आहे. त्यातच, तौक्तो चक्रीवादळाच्या पार्श्वभूमीवर मुंबई पालिकेने खबरदारी घेतली आहे. त्यामुळे आज, सोमवारी पालिकेने सावधगिरी म्हणून संपूर्ण शहरातील लसीकरण एका दिवसापुरते थांबविण्याचे ठरविले आहे. मुंबईकरांना लसीकरणासाठी शनिवार, रविवारपाठोपाठ आणखी एक दिवस थांबावे लागणार आहे. लसीकरण मंगळवारपासून पूर्ववत होणार आहे. मुंबई पालिकेने सोमवार ते बुधवारपर्यंत ज्येष्ठ नागरिक आणि दिव्यांगांना कोणत्याही नोंदणीशिवाय थेट लसीकरण केंद्रांवर दुसरा डोस मिळणार असल्याची घोषणा केली होती. गेल्या आठवड्यात घेतलेल्या निर्णयाने ज्येष्ठ नागरिक, दिव्यांगांना दिलासा मिळणार असल्याच्या प्रतिक्रिया उमटल्या. परंतु नेमक्या त्याच कालावधीत केंद्र सरकारने दुसऱ्या डोसच्या निर्धारित कालावधीसंबंधी केलेली सूचना आणि चक्रीवादळामुळे त्या निर्णयावर परिणाम झाला आहे. सध्या चक्रीवादळाचे सावट असल्याने मुंबईत विशेष लक्ष पुरविले जात आहे. केरळ, गोव्यापासून ते सिंधुदुर्गसह विविध किनारपट्ट्यांवर वादळी वारे, पाऊस दाखल झाला आहे. ही परिस्थिती पाहून पालिकेने रविवारी काही महत्त्वाचे निर्णय घेतले. मुंबईत चक्रीवादळाचा थेट धोका नसला तरीही पाऊस, वाऱ्याची शक्यता लक्षात घेऊन पालिका आणि सरकारी लसीकरण केंद्रावर सोमवारी एका दिवसासाठी थांबविण्याचा निर्णय घेण्यात आला. चक्रीवादळाचा आढावा घेत पालिकेने मुंबईतील लसीकरण मोहीम आज, सोमवारी एका दिवसापूर्वी थांबविण्याचा निर्णय घेतला आहे. त्यामुळे सोमवारी शहरात कोणत्याही लसीकरण केंद्रांवर लस दिली जाणार नसल्याचे स्पष्ट झाले. ज्येष्ठ नागरिक, दिव्यांगांना अॅपवरील नोंदणीविना थेट दुसरा डोस मिळण्याची घोषणा करण्यात आली होती. मात्र सोमवारी ते प्रत्यक्षात येणार नाही. त्यापूर्वी पालिकेने शनिवारी आणि रविवारी लसीकरण होणार नसल्याचे जाहीर केले होते. या निर्णयामुळे सलग तीन दिवस लसीकरण खंडित झाले आहे. दुसरा डोस वेळेत मिळावा लशींच्या तुटवड्यामुळे १८ ते ४४ वर्षांपर्यंतच्या नागरिकांना पहिला डोस देणे सध्या बंद केले आहे. मात्र, दुसरा डोस तरीही वेळेत मिळावा, अशी मुंबईकरांची मागणी आहे. त्यात केंद्र सरकारच्या दुसऱ्या डोससाठी जाहीर झालेल्या वाढीव कालावधीने लसीकरण मोहिमेवरील ताण कमी होण्याचा दावा केला जात आहे.