म. टा. विशेष प्रतिनिधी, मुंबई मुंबईत १८ ते ४४ वयोगटातील ५० लाख ५० हजार नागरिक आहेत. त्यांना लस देण्यासाठी ३५० कोटी रुपये खर्च होणार आहेत. बँकांमध्ये महापालिकेच्या ८० हजार कोटींच्या मुदत ठेवी आहेत. त्यामुळे पालिकेने हा खर्च करावा, अशी मागणी भाजपतर्फे पालिका आयुक्तांकडे सोमवारी करण्यात आली. मुंबईतील लसीकरणाच्या पार्श्वभूमीवर भाजपचे मुंबई अध्यक्ष मंगलप्रभात लोढा यांच्या नेतृत्वाखाली विधान परिषदेतील विरोधी पक्षनेते प्रवीण दरेकर, आमदार अॅड. आशीष शेलार, अतुल भातखळकर, भालचंद्र शिरसाट, प्रभाकर शिंदे यांच्या शिष्टमंडळाने पालिका आयुक्त इक्बालसिंह चहल यांची भेट घेतली. मुंबईमध्ये लशीचा तुटवडा आहे. नागरिकांना लस मिळत नाही. पालिकेच्या नियोजनशून्य कारभारामुळे हे सर्व होत आहे. यामुळे पालिकेने जागतिक निविदा मागवून लशी विकत घ्याव्यात आणि मुंबईकरांना मोफत लस द्याव्यात, अशी मागणी दरेकर यांनी केली. यावर आयुक्तांनी जागतिक निविदा काढण्याचे आश्वासन दिल्याचे ते म्हणाले. दरम्यान, केंद्र सरकारच्या धोरणानुसार खासगी रुग्णालय व राज्य सरकार लशीच्या ५० टक्के उत्पादनाची थेट खरेदी करू शकतात. त्यामुळे पालिकेने राज्य सरकारमार्फत तातडीने लशीची खरेदी करावी, अशी सूचना लोढा यांनी केली. पालिका आयुक्त पक्षपाती? मुंबईत नागरिकांना लस मिळावी यासाठी २२७ नगरसेवकांच्या वॉर्डमध्ये लसीकरण केंद्र उभारले जात आहे. शिवसेनेच्या नगरसेवकांच्या वॉर्डमध्ये लसीकरण केंद्र सुरू करण्याची परवानगी पालिका आयुक्त देत आहेत. मात्र नगरसेवकांच्या वॉर्डमध्ये असे केंद्र उभारण्यास ते आडकाठी आणत आहेत. हा भाजपशी पक्षपात केला जात असल्याचा आरोप दरेकर यांनी केला.
0 Comments