करोनाच्या तिसऱ्या लाटेत लहान मुलांना संसर्गाची भीती; टास्क फोर्सने दिला हा सल्ला

‌म. टा. विशेष प्रतिनिधी, मुंबई संसर्गाची तिसरी लाट पावसाळ्याच्या दरम्यान येण्याची शक्यता आहे. यामध्ये मुलांना संसर्गाची भीती व्यक्त करण्यात आली असली, तरीही नॉन कोविड आजाराकडे पावसाळ्याच्या काळात दुर्लक्ष करू नका, असा सल्ला लहान मुलांच्या टास्क फोर्सचे अध्यक्ष डॉ. सुहास प्रभू यांनी दिला आहे. करोना संसर्गाची तिसरी लाट आल्यास मुलांना वैद्यकीय उपचार कसे करावेत यासंदर्भात बालरोगतज्ज्ञांना रविवारी मार्गदर्शन करण्यात आले. त्यात राज्याच्या वेगवेगळ्या भागांतील दोन हजार डॉक्टर उपस्थित होते. पावसाळ्यामध्ये डेंग्यू, , व्हायरल तापाचाही जोर असतो. स्वाइन फ्लूचाही फैलाव होऊ शकतो. त्यामुळे मुलांना आलेला प्रत्येक ताप हा करोना संसर्गाचा ताप आहे, असे समजून घाबरून जाऊ नका. मुलांना करोनाच झाला या भीतीची लाट ही प्रत्यक्ष करोना संसर्गापेक्षा अधिक घातक असू शकते, असेही यावेळी बालरोगतज्ज्ञांनी स्पष्ट केले. प्रत्येक वर्षी पावसाळ्यामध्ये वातावरणातील बदलामुळे मुलांना संसर्ग होण्याची, तसेच मुले आजारी पडण्याची शक्यता अधिक असते. त्यामुळे मुलांमध्ये दिसत असलेली लक्षणे ही नेमकी करोनाची आहेत की, इतर आजारांची हे तपासून पाहायला हवे. त्यासाठी 'फिव्हर क्लिनिक'ची मदत घेणे, डॉक्टरांशी संवाद साधणेही महत्त्वाचे असल्याचे यावेळी वैद्यकीय तज्ज्ञांनी स्पष्ट केले. मूल डॉक्टरांकडे जाते, त्यावेळी पालकांना महत्त्वाचे प्रश्न विचारणे गरजेचे आहे. त्यात ताप कमी असताना रुग्ण कसा वागतो, इतर लक्षणे कोणती आहेत, श्वास घेताना त्रास होतो का, असलेली लक्षणे ही तीव्र होत आहे का, मुलाला ताप आला असताना त्याच्या घरी कोण आहे, तिथे कुणाला ताप येत आहे का, असे प्रश्न विचारणे गरजेचे आहे. डॉक्टरांनी संशयित मुलांमध्ये करोनाची चाचणी करण्याचा वैद्यकीय सल्ला द्यायला हवा, असेही यावेळी स्पष्ट करण्यात आले.