'एसटीच्या कर्मचाऱ्यांना प्राधान्याने लस द्यावी'

म. टा. प्रतिनिधी, मुंबई मुंबईसह राज्यात अत्यावश्यक सेवेतील कर्मचाऱ्यांच्या वाहतुकीची जबाबदारी पार पाडणाऱ्या एसटी कर्मचाऱ्यांचे प्राधान्याने लसीकरण करावे, अशी विनंती परिवहनमंत्री आणि एसटी महामंडळाचे अध्यक्ष यांनी मुख्यमंत्री यांच्याकडे केली आहे. एसटी महामंडळात सध्या सुमारे ९८ हजार कर्मचारी कार्यरत आहेत. राज्याच्या प्रत्येक जिल्ह्यामध्ये पोलिस कर्मचारी, डॉक्टर, परिचारिका, वैद्यकीय क्षेत्रातील कर्मचारी, बँक कर्मचारी अशा अनेक अत्यावश्यक सेवेमध्ये काम करणाऱ्यांना सुरक्षित प्रवासीसेवा देण्याचे काम एसटीचे कर्मचारी अव्याहतपणे करत आहेत. दीड वर्ष सरकारने वेळोवेळी दिलेल्या निर्देशानुसार लाखो परप्रांतीयांना राज्याच्या सीमेपर्यंत सुरक्षित नेऊन सोडणे, हजारो विद्यार्थ्यांना परराज्यातून महाराष्ट्रात त्यांच्या घरी सुखरूप आणून सोडणे, हजारो ऊसतोडणी कामगारांना कारखान्यापासून त्यांच्या घरी पोहोचवणे, अत्यावश्यक सेवेतील अन्नधान्य, शेतीमाल व इतर मालवाहतुकीमध्ये महत्त्वपूर्ण योगदान देणे, वैद्यकीय ऑक्सिजन टँकरसाठी, तसेच शासकीय रुग्णावाहिकेसाठी चालक पुरवणे अशा विविध कामांमध्ये एसटी कर्मचारी आत्तापर्यंत अग्रेसर राहिले आहेत. प्रवासादरम्यान अनेक प्रवाशांशी त्यांचा संपर्क येतो. तसेच शासनाच्या निर्देशानुसार सार्वजनिक वाहतूकसेवेमध्ये काम करणाऱ्या कर्मचाऱ्यांना करोना आरटीपीसीआर चाचणी करणे आवश्यक केले आहे. या सगळ्याचा विचार करता, संबंधित एसटी कर्मचाऱ्यांना करोनाचा प्रादुर्भाव होण्याची दाट शक्यता लक्षात घेऊन त्यांचे लसीकरण प्राधान्याने करण्यात यावे, अशी विनंती परब यांनी केली आहे.