ज्येष्ठ कार्यकर्त्या प्रेरणा राणे यांचे निधन

म. टा. विशेष प्रतिनिधी, मुंबई लोकविज्ञान चळवळीच्या स्थापनेपासून विज्ञान प्रचारक म्हणून काम करणाऱ्या ज्येष्ठ कार्यकर्त्या (६५)यांचे शुक्रवारी कणकवली येथे करोनाने निधन झाले. त्यांच्या निधनाने विज्ञान प्रचारातील तारा निखळल्याची भावना व्यक्त होत आहे. मॅकेनिकल इंजिनीअरिंगची पदवी घेऊन प्रेरणा राणे यांनी काही काळ व्हीजेटीआय येथे प्राध्यापक म्हणून नोकरी केली. यानंतर त्यांनी कॉर्पोरेट क्षेत्रात काहीकाळ नोकरी केली. पण मुळात सामाजिक बांधिलकी मनात असल्याने त्यांनी सामाजिक उपक्रमांना स्वत:ला वाहून घेतले. १९८०च्या काळात खग्रास सूर्यग्रहणाबाबत लोकांमध्ये जनजागृती करण्यासाठी त्यांनी मोठ्या प्रमाणावर कार्य केले. याचकाळात त्यांनी लोकविज्ञान चळवळीला स्वत:शी जोडून घेतले. विज्ञान प्रदर्शनांचे आयोजन करण्यापासून ते विज्ञानाबद्दल प्रचार प्रसार करणे, विज्ञान दिनदर्शिका निर्मितीमध्येही त्यांचे मोलाचे योगदान होते. यानंतर त्यांनी विविध सामाजिक कार्यात स्वत:ला वाहून घेतले. गेल्या काही वर्षांपासून त्या सिंधुदुर्गातील होडावडे गावात शेती करत होत्या. प्रयोगशील शेतीच्या माध्यमातून त्यांनी तेथे वेगवेगळे प्रयोग केले. याचबरोबर येथील मुलांनाही विज्ञान शिक्षणाबाबत त्या मार्गदर्शन करत होत्या. त्यांच्या प्रयोगाची दखल विविध स्तरावर घेण्यात आली. त्यांचे बंधू पर्यावरण तज्ज्ञ उल्हास राणे यांचेही गतवर्षी करोनामुळे निधन झाले होते.