करोनाकाळात विश्वासार्ह संदेशांसाठी 'टाइम्स व्हेरिफाइड'

‌म. टा. प्रतिनिधी, मुंबई करोनावर मात करण्यासाठी हे पाच रामबाण उपाय करा... शहरात कडक लॉकडाउन लागणार असल्याने आजच खरेदी करून ठेवा... अशा स्वरूपाचे अनेक 'फॉरवर्डेड' संदेश सोशल मीडियाच्या माध्यमातून अलीकडच्या काळात तुमच्या मोबाइलवर येत असल्याने नक्की विश्वास कशावर ठेवायचा, असा प्रश्न पडणे स्वाभाविक आहे. म्हणूनच करोनाकाळातील आरोग्य आणि लॉकडाउनबाबतच्या चुकीच्या आणि दिशाभूल करणाऱ्या संदेशांची खातरजमा करून वाचकांपर्यंत योग्य माहिती पोहोचविण्यासाठी 'महाराष्ट्र टाइम्स'तर्फे आजपासून '' ही मोहीम सुरू केली जात आहे. मनात शंका निर्माण करणाऱ्या, उपचारांबाबत संभ्रम उत्पन्न करणाऱ्या आणि एखादी माहिती खरी आहे, की नाही, याविषयीचा भ्रम दूर करून खऱ्या-खोट्याची शहानिशा 'टाइम्स व्हेरिफाइड'द्वारे केली जाणार आहे. सोशल मीडियावरून येणाऱ्या एखाद्या अशा संदेशाची सत्य-असत्यता पडताळण्यासाठी आपण फक्त टाइम्स व्हेरिफाइडचा ९८१९४३२२२२ हा क्रमांक मोबाइलवर सेव्ह करा. शंका किंवा त्याबद्दल खरे-खोटे जाणून घेण्यासाठी संबंधित संदेश व्हॉट्स-अॅपद्वारे या क्रमांकावर पाठवा. 'टाइम्स व्हेरिफाइड'अंतर्गत 'महाराष्ट्र टाइम्स'ने एक तज्ज्ञ समिती नियुक्त केली असून, संपादकीय सहकाऱ्यांसह त्यात वैद्यकीय तज्ज्ञ आणि महापालिकेच्या अधिकाऱ्यांचा समावेश आहे. तुम्ही पाठविलेला संदेश योग्य आहे, की चुकीची माहिती देणारा आहे, याची खातरजमा करून नेमकी आणि अचूक माहिती तुमच्यापर्यंत पोहोचविण्यासाठी ही मोहीम राबविली जाणार आहे. समाजामध्ये कोणत्याही प्रकारची चुकीची माहिती आणि गैरसमजुती पसरू नयेत, यासाठी 'महाराष्ट्र टाइम्स'ने पुढाकार घेतला असून, सध्याच्या कोविड साथरोगाच्या काळात तुमच्यापर्यंत येणारी प्रत्येक माहिती खात्रीशीर असावी, यासाठीच हा प्रयत्न आहे. कोविडच्या दुसऱ्या लाटेमध्ये नेमकी माहिती मिळावी, यासाठी सर्वांचीच धडपड सुरू आहे. त्यामुळे मित्र-नातेवाइकांनी खूप ठिकाणांहून फॉरवर्ड झालेला संदेश पाठवला आणि आजारी व्यक्तीस किंवा तातडीने उपचार हवे असल्यास त्याचा उपयोग होईल, असे सांगितले असेल, तर जरा थांबा. 'टाइम्स व्हेरिफाइड'ला संबंधित संदेश पाठवून तो विश्वासार्ह आहे ना, याची खात्री करा आणि मगच पुढची पावले उचला. अन्यथा तुमच्या संबंधित मित्र-नातेवाइकांना हा संदेश चुकीचा आणि दिशाभूल करणारा आहे, हेदेखील अगदी विश्वासाने सांगा. 'टाइम्स व्हेरिफाइड'साठी एवढेच करा पहिला टप्पा... ९८१९४३२२२२ हा क्रमांक मोबाइलवर 'टाइम्स व्हेरिफाइड'म्हणून सेव्ह करा. दुसरा टप्पा एखाद्या संदेशाबद्दल शंका-संभ्रम असल्यास तो व्हॉट्स-अपद्वारे 'महाराष्ट्र टाइम्स'च्या समितीकडे सत्यता पडताळणीसाठी पाठवा तिसरा टप्पा हा संदेश खरा आहे की चुकीचा-गैरसमज पसरविणारा आहे, हे तुम्हाला 'टाइम्स व्हेरिफाइड'द्वारे कळविण्यात येईल.