म. टा. विशेष प्रतिनिधी, मुंबई मुंबईत सध्या रुग्ण घटत असली तरीही करोनाची संभाव्य तिसरी लाट लक्षात घेऊन मुंबई पालिका अधिक सावध आहे. त्यासाठी पालिकेकडून वरळीतील मुलांसाठी ५०० खाटांचे जम्बो करोनाकेंद्र सेवेत आणले जाणार आहे. त्यात, ७० टक्के ऑक्सिजन आणि २०० आयसीयू खाटांचा समावेश केला आहे. मुंबईत करोनाची तिसरी लाट येऊ शकते, या शक्यतेने पालिकेने नियोजन सुरू केले आहे. या लाटेत मुलांना अधिक बाधा होण्याचीही भीती व्यक्त केली जाते. म्हणूनच पालिकेने त्यादृष्टीने तयारी चालविली आहे. त्याचा भाग म्हणूनच केवळ मुलांसाठी स्वतंत्र जम्बो करोनाकेंद्र सुरू करण्याचा निर्णय घेण्यात आला आहे. गेल्यावर्षी पालिकेने करोना रुग्णांसाठी पाच सुरू केली. सध्या मुंबईत करोनाची दुसरी लाट सुरू असून रुग्ण संख्या नियंत्रणात आली आहे. जुलै-ऑगस्टमध्ये करोनाच्या तिसऱ्या लाटेत मुलांना त्याचा संसर्ग होण्याची शक्यता टास्क फोर्सने वर्तवली आहे. त्यासाठीच पूर्वतयारी सुरू केली आहे. वरळीत उभारले जाणारे करोना केंद्र हे १ ते १८ वर्षे वयोगटातील मुलांसाठी असेल. हे नवीन केंद्र ३१ मेपूर्वी पूर्ण करण्याचा पालिकेचा मानस आहे. या केंद्रासाठी पालिकेस 'सीआरएस' निधीतून ५० कोटी रुपये निधी उपलब्ध झाला आहे. ११ करोनाकेंद्रांत २० हजार खाटा मुंबईत तीन भागात प्रत्येकी २ हजार खाटांचे जम्बो करोनाकेंद्रे बांधली जाणार आहेत. मालाड, सायनचे सोमय्या वैद्यकीय केंद्र आणि कांजुरमार्गमधील क्रॉम्प्टन कंपनीत नवीन जम्बो रुग्णालये उभी करण्यात येतील. तसेच, सध्याच्या जम्बो करोना केंद्रात ६ हजार अधिक खाटा पुरविल्या जातील. तसेच, पुढील कालावधीत एकूण ११ जम्बो करोना केंद्रे असून त्यातून सुमारे २० हजार खाटा उपलब्ध होतील. त्याठिकाणी ऑक्सिजनचा पुरवठा निरंतर होईल, याचीही तजवीज केली जाणार आहे.
0 Comments