गरीबांना पैशाचे आमिष दाखवत त्यांची मुले विकणाऱ्या महिलेला अटक

म. टा. वृत्तसेवा, : पोटी मूल जन्माला येत नसल्यामुळे त्रासलेले पालक दत्तक प्रक्रियेनुसार मुले दत्तक घेण्यासाठी वर्षानुवर्षे प्रतीक्षा करत असताना बेकायदा दत्तक प्रक्रियेद्वारे मुलांची परस्पर खरेदी-विक्री केली जात असल्याची गंभीर बाब जिल्हा महिला बाल संरक्षण कक्ष आणि कल्याण क्राइम ब्रांचच्या युनिटने केलेल्या कारवाईत उघड झाली आहे. मूल दत्तक घेण्यासाठी इच्छुक पालकांना हेरून दुसरीकडे गरीब पालकांना पैशाचे आमिष दाखवत त्यांची मुले विकणाऱ्या महिलेला कल्याण स्टेशन परिसरात कल्याण गुन्हे शाखेच्या पोलिसांनी रंगेहाथ अटक केली आहे. तसेच स्वत:च्या मुलाची विक्री करणाऱ्या दाम्पत्यालादेखील पोलिसांनी चौकशीसाठी ताब्यात घेत या पाच महिन्यांच्या चिमुकल्याला महिला बाल विकास विभागाच्या ताब्यात दिले आहे. मानसी जाधव ही महिला काही महिने डोंबिवलीतील जननी आशिष बालसुधारगृहात आयाचे काम करत होती. या काळात तिने दत्तक घेण्यासाठी येणाऱ्या पालकांचे संपर्क क्रमांक मिळवून या केंद्रातील नोकरी सोडली. यादरम्यान तिला दत्तक प्रक्रिया किचकट असल्याची आणि पालकांना मूल दत्तक मिळण्यास काही वर्षे प्रतीक्षा करावी लागत असल्याची माहिती मिळाली. यामुळेच तिने गरजू पालकांना हेरून त्यांना कायदेशीर दत्तक प्रक्रियेविना मुले मिळवून देण्याचा गोरखधंदा सुरू केला. उल्हासनगरमधील एका गरीब दाम्पत्याला पैशाचे आमिष दाखवत त्याना त्यांच्या मुलांपैकी एका मुलाची विक्री करण्यास तयार केले. यानंतर जननी आशिष बालसुधारगृहात नोंदणी केलेल्या एका व्यक्तीला फोन करून आपल्याकडे एक पाच महिन्यांचे बालक असून ते दोन लाखांत विकण्यास तयार असल्याचे सांगत व्यवहार सुरू केला. मात्र प्रक्रिया पूर्ण न करता बेकायदा मूल दत्तक घेणे योग्य नसल्याची कल्पना असलेल्या त्या कुटुंबाने या बेकायदा प्रक्रियेबाबत जिल्हा महिला व बाल विकास विभागाकडे तक्रार केली. प्रकरणाचे गांभीर्य लक्षात घेऊन संबंधित विभागाने कल्याण गुन्हे शाखेकडे तक्रार करत गुन्हे शाखेचे पोलिस उपायुक्त कडलक यांनी इतर कर्मचाऱ्यांच्या मदतीने सापळा रचला. यासाठी कल्याण रेल्वे स्टेशन परिसरात जिल्हा बाल संरक्षण कक्षाच्या कर्मचाऱ्यांनाच बनावट ग्राहक बनविण्यात आले. शनिवारी सकाळी या बनावट ग्राहकांनी सदर महिलेला पाच महिन्यांच्या बालकाच्या बदल्यात १ लाख ९० हजार रुपये घेत असताना ताब्यात घेण्यात आले. यापूर्वीही मुलांची विक्री या दरम्यान सदर महिलेसह या बालकाच्या आई-वडिलांना देखील पोलिसांनी ताब्यात घेतले असून सदर महिलेने यापूर्वीही दोन ते तीन बालकांची विक्री केल्याची माहिती असून याप्रकरणी पोलिस चौकशी करणार आहेत. जिल्हा महिला व बाल विकास अधिकारी महेंद्र गायकवाड यांच्या मार्गदर्शनाखाली सदरची कार्यवाही जिल्हा बाल संरक्षण अधिकारी रामकृष्ण रेड्डी, संस्थात्मक सरक्षण अधिकारी पल्लवी जाधव, सामाजिक कार्यकर्ता रोहिणी शिरसाट, क्षेत्रीय कार्यकर्ता कृष्णा मोरे यांनी पूर्ण केली. दरम्यान अशा कारवाईमुळे बेकायदा मानवी तस्करीस निश्चितच आळा बसेल, असा विश्वास रामकृष्ण रेड्डी यांनी व्यक्त केला आहे.