'व्हॅक्सिनेशन टूरिझम'मुळे पर्यटन उद्योगात आनंद

टाइम्स न्यूज नेटवर्क, करोनाच्या संकटामुळे मागील दीड वर्षांपासून ठप्प असलेल्या विदेशी पर्यटन व्यवसायाला थोडासा दिलासा मिळण्याची चिन्हे दिसू लागली आहेत. रशियामध्ये जाऊन पर्यटनासोबतच 'स्फुटनिक व्ही' या लशीचे दोन डोस घेण्याची संधी रशियन सरकारने उपलब्ध करून दिली आहे. त्यामुळे विदेशवारी करू इच्छिणाऱ्या हौशी पर्यटकांची आणि पर्यायाने पर्यटन कंपन्यांची प्रतीक्षा लवकरच संपुष्टात येणार आहे. दिल्लीतील एका पर्यटन कंपनीने दिलेल्या प्रस्तावाला रशियन आणि भारत सरकारने मान्यता दिली. त्यानुसार १५ मे रोजी गुरुग्राममधील ३० पर्यटकांचे एक पथक 'व्हॅक्सिनेशन टूरिझम'साठी रशियाला गेले असून २९ मे रोजी जाणाऱ्या दुसऱ्या फेरीतील सर्व जागांचे बुकिंग झाले आहे, असे या पर्यटन कंपनीच्या एका अधिकाऱ्याने सांगितले. या व्हॅक्सिनेशन टूरची प्रतिव्यक्ती किंमत १ लाख ३० हजार ते १ लाख ५० हजार रुपयांपर्यंत आहे. दिल्लीप्रमाणेच मुंबई, कोलकाता आणि इतर मोठ्या शहरांमधील पर्यटन कंपन्यांनीसुद्धा अशाच प्रकारचे टूर पॅकेजेस ग्राहकांसाठी उपलब्ध करून दिले आहेत. आंतरराष्ट्रीय प्रवासावरील निर्बंध उठल्यानंतर रशियाप्रमाणेच दुबई आणि अमेरिकेत जाऊन लस घेता येऊ शकते, असे सूत्रांचे म्हणणे आहे. असे आहे पॅकेज... - हा 'व्हॅक्सिनेशन टूर' एकूण २४ दिवसांचा असेल. - रशियाला जाण्यापूर्वी संबंधित पर्यटकाची आरटीपीसीआर चाचणी निगेटिव्ह असणे आवश्यक आहे. - रशियात पोहोचल्यानंतर दुसऱ्या दिवशी पर्यटकांना 'स्फुटनिक व्ही'चा पहिला डोस दिला जाईल. - त्याानंतर २१ दिवसांनी या लशीचा दुसरा डोस दिला जाईल. - दोन डोस दरम्यानच्या काळात पर्यटकांना मॉस्को आणि सेंट पिट्सबर्ग या शहरांमधील पर्यटनस्थळे पाहता येतील.