फूटपाथ सुशोभीकरणास तब्बल ४१ कोटींचा निधी

म. टा. विशेष प्रतिनिधी, मुंबई आधुनिक तंत्रज्ञानाचा वापर करून तयार करण्यात आलेले आकर्षक फूटपाथ, उड्डाणपुलाखाली उद्याने या पद्धतीने महापालिकेने सुशोभीकरणाचा धडाका लावला आहे. दादर आणि वरळीपाठोपाठ आता वडाळा आणि चेंबूर परिसरातील च्या सुशोभीकरणाची कामे केली जाणार आहेत. या दोन विभागातील कामांसाठी तब्बल ४१ कोटी रुपये खर्च केले जाणार आहेत. पर्यावरण मंत्री यांचा विधानसभा मतदारसंघ असलेल्या परिसरात आंतरराष्ट्रीय दर्जाची अनेक विकासकामे करण्यात येत आहेत. सेनापती बापट मार्ग, दादर उड्डाणपुलाखालील मोकळ्या जागेत उद्याने तयार केली जात आहेत. प्रभादेवी येथे समुद्रकिनारा परिसराचे सुशोभीकरण केले जात आहे. गणेश विसर्जन जेट्टी, वरळी पोलिस कॅम्प येथील डोंगराच्या ठिकाणी धूप प्रतिबंधक भिंत, माहीमचे हिंदुजा रुग्णालय ते प्रभादेवी येथील सिद्धिविनायक मंदिरापर्यंत फूटपाथ व नवीन रेलिंग बसवण्यात येत आहे. निविदा मागवल्या या कामांसोबत पालिकेने वडाळा रेल्वे स्थानक ते रुईया कॉलेज, सेंट जोसेफ चर्च सर्कल ते लेडी जहांगीर रोड, दादर आणि चेंबूर रेल्वे स्थानक ते डायमंड गार्डन, महर्षी दयानंद मार्गाचे सुशोभीकरण करण्याचे ठरवले आहे. मागील अनेक वर्षांपासून या भागातील फूटपाथची दुरुस्ती तसेच सुशोभीकरण करण्यात आलेले नाही. वडाळा रेल्वे स्थानकापासून सेंट जोसेफ चर्च सर्कल व पुढे पाच उद्यानापासून रुईया कॉलेजपर्यंत जुन्या काळातील फूटपाथ आहेत. एकूण १५ महिन्यांत हे काम पूर्ण करण्यात येणार असून त्यासाठी पालिकेने शनिवारी निविदा मागवल्या आहेत.