'तो' वृद्ध महिलेच्या घरी करोना लसीकरणाबाबत माहिती घेण्यासाठी आला अन्...

म. टा. खास प्रतिनिधी, मुंबई लसीकरणाबाबत माहिती घेत आहे, असे सांगून घरात शिरलेल्या महिलेने वृद्ध महिलेचे तीन लाख रुपयांचे दागिने आणि रोख रक्कम घेऊन पोबारा केल्याची घटना वरळी परिसरात घडली आहे. याप्रकरणी वरळी पोलिस ठाण्यात गुन्हा दाखल करण्यात आला असून, सीसीटीव्ही फूटेज तसेच इतर पुराव्यांच्या आधारे पोलिस या महिलेचा पोलिस शोध घेत आहेत. या घटनेमुळे परिसरात घबराट निर्माण झाली आहे. वरळीच्या गोपचार सोसायटीमध्ये ७४वर्षीय महिला आपला मुलगा, सून आणि नातवासोबत वास्तव्यास आहेत. बुधवारी मुलगा आणि सून घराबाहेर गेले असताना वृद्ध महिला नऊ वर्षांच्या नातवासह घरी होत्या. दुपारी १२च्या सुमारास एका महिलेने त्यांच्या घराचा दरवाजा ठोठावला. करोना लसीकरणाबाबत माहिती घेतली आणि तुम्ही लस घेतली का? अशी विचारणा करीत तिने दरवाजा उघडण्यास सांगितले. वृद्धेने तिला घरात घेताच या महिलेने पेपरवर सही घेण्याचा बहाणा केला आणि पाण्याची मागणी केली. आजीबाई पाणी आणण्यासाठी आतील खोलीत जाताच महिलेने तिच्या नातवाचे हातपाय बांधले आणि घरात गेली. वृद्धेच्या गळ्यावर चाकू ठेवून या महिलेने घरातील सुमारे तीन लाखांचे सोन्याचे दागिने आणि १० हजार रुपयांची रोख रक्कम घेऊन पोबारा केला. या घटनेमुळे घाबरलेल्या आजींनी याबाबतची माहिती मुलाला दिली. या कुटुंबाने पोलिसांकडे तक्रार केल्यानंतर अनोळखी महिलेविरोधात गुन्हा दाखल करण्यात आला. आजींनी लूट करणाऱ्या महिलेचे केलेले वर्णन तसेच इमारतींच्या आजुबाजूस असलेल्या सीसीटीव्ही फूटेजवरून या महिलेचा शोध घेण्यात येत असल्याचे पोलिसांनी सांगितले.