लशीच्या प्रतीक्षेत मुंबईकर चिंतातुर

म. टा. विशेष प्रतिनिधी, मुंबई करोनाच्या सध्याच्या दुसऱ्या लाटेपाठोपाठ जुलै-ऑगस्टमध्ये तिसरी लाट येण्याची भीती व्यक्त होत असून संसर्गापासून बचावासाठी लसीकरण हे महत्त्वपूर्ण सुरक्षाकवच असल्याचे वैद्यकीय तज्ज्ञ सातत्याने सांगत आहेत. असे असतानाही, गेल्या काही दिवसांत मुंबईत करोना प्रतिबंधक लसीकरणाचा वेग कमी होत चालला आहे. लशी उपलब्ध होत नसल्याने शहरातील खासगी, सरकारी, पालिकेच्या अशा सर्वच केंद्रांवरील लसीकरणाची संख्या अगदीच मर्यादित राहिली आहे. करोनाचा संसर्ग भेडसावत असतानाच, लसीकरणाचा गोंधळ संपत नसल्याने मुंबईकर त्रासले आहेत. त्यातच, लशीचा दुसरा डोस घेण्याची निर्धारित वेळ येत येऊनही लस मिळत नसल्याने मुंबईकर चिंतातुर झाले आहेत. संपूर्ण मुंबईभर पहिला वा दुसरा डोस कधी मिळणार, हा प्रश्न सातत्याने विचारला जात आहे. मुंबईत १ मे पासून १८ ते ४४ वर्षे वयोगटासाठीही करोना प्रतिबंधक लस देण्याचे जाहीर केले गेले. मात्र त्याचवेळी, लस पुरवठा कमी होत गेल्याने मुंबई पालिकेसमोरही व्यवस्थापन, नियोजनाची समस्या निर्माण झाली आहे. लसीकरणासाठी वाढती गर्दी, केंद्रांवर होणारी चेंगराचेंगरी पाहून पालिकेने लसीकरणासाठी केवळ अॅप, पोर्टल याद्वारेच नोंदणी बंधनकारक केली आहे. हा निर्णय घेताना कोव्हिशिल्डचा दुसरा डोस घेणाऱ्यांना थेट केंद्रांवर जाण्यापासून मज्जाव केला आहे. या विचित्र कोंडीतत दुसऱ्या डोसची निर्धारित वेळ आली, तरीही लस उपलब्ध होत नसल्याने नेमके काय करायचे, असा प्रश्न मुंबईकरांना पडला आहे. त्याचे उत्तर अद्याप मिळालेले नाही. दररोज सकाळपासून रात्री उशीरापर्यंत लस घेण्यासाठी अॅप, पोर्टलवर सतत प्रयत्न करूनही निराशाच पदरी पडत असल्याचा अनुभव हजारोंना येत आहे. एकीकडे, पहिला डोस घेणाऱ्यांची उपेक्षा होत असतानाच, दुसरा डोस घेणाऱ्यांनाही वेगळा अनुभव आलेला नाही. दुसरा डोस उशीरा घेण्याचीही आमची तयारी आहे, पण तो डोस कधी मिळणार याविषयी काहीही माहिती मिळत नाही, अशी तक्रार अनेक मुंबईकर करत आहेत. एकीकडे डोस उपलब्ध नसताना पालिकेने वाहनतळांमध्ये 'ड्राइव्ह इन' मोहीम, प्रत्येक विभागात एक लसीकरण केंद्र सुरू करण्याचा धडाका लावला आहे. मात्र ते करताना तिथे लोकांना डोस मिळणार का, याची काहीही खात्री नसल्याचा मुद्दा उपस्थित केला जात आहे. लसीकरण मोहिमेत पालिकेच्या नियोजनाचा अभाव आहे, अशी टीका पालिकेतील भाजपचे गट नेते प्रभाकर शिंदे यांनी केली आहे. लस मिळण्यासाठी मुंबईकर प्रयत्न करत असले, तरीही त्यांची पूर्णपणे निराशा होत असल्याचे शिंदे यांनी नमूद केले आहे.