मुंबईकरांना दिलासा! शहराभोवतीचा करोनाचा विळखा सैल

म. टा. विशेष प्रतिनिधी, मुंबईतील रुग्णांची प्रचंड प्रमाणात वाढलेली संख्या हळूहळू आटोक्यात येत असल्याचे दिलासादायक चित्र दिसत आहे. मुंबई पालिकेकडे शनिवारी नवीन रुग्णांची संख्या १,४४७ अशी नोंदवली गेली. गेल्या महिनाभरात दिवसाकाठी १० ते ११ हजारांपर्यंत पोहोचलेल्या रुग्णसंख्येस उतार येऊ लागला आहे. मुंबईत फेब्रुवारी मध्यानंतर करोना रुग्णसंख्येने डोके वर काढले आणि संपूर्ण मुंबई त्यात अडकून पडली. करोनारुग्णांची संख्या झपाट्याने वाढत गेल्याने चिंतेची परिस्थिती निर्माण झाली होती. पालिकेने रुग्णांच्या शोधासाठी चाचण्यांची संख्या वाढविताना उपचारांवरही लक्ष दिले. त्यापाठोपाठ राज्यात लॉकडाउन लागू झाल्याने रुग्णसंख्या आटोक्यात येण्यास सहाय्य मिळत असल्याचे जाणवते. शनिवारी, मुंबईत नवीन रुग्णांची संख्या १,४४७ होती तर बरे झालेल्यांची संख्या २,३३३ इतकी झाली आहे. करोनाबाधितांची संख्या कमी होत असतानाच करोनाने मृत पावणाऱ्यांच्या संख्येतही घट होत आहे. शनिवारी एका दिवसात करोनाबाधित मृत्यूंची नोंद ६२ एवढी आहे. त्याचवेळी रुग्ण बरे होण्याचे प्रमाणही ९२ टक्क्यांवर पोहोचले आहे. गेल्या काही दिवसांपासून सतत वाढत जाणाऱ्या रुग्णसंख्येच्या तुलनेत मे महिन्यातील आकडेवारी चिंता दूर करणारी ठरत आहे. यापूर्वी १० मार्च रोजी १,५३९ आणि ११ मार्च रोजी १,५०८ रुग्ण आढळले होते. त्यानंतर रुग्णांचा आकडा हा वाढत जात १० ते ११ हजारांपर्यंत पोहोचला होता. दुपटीचा कालावधी २१३ दिवसांवर मुंबईत सरासरी रुग्ण दुपटीचा कालावधी २१३ दिवसांवर पोहोचला आहे. गेल्या महिन्यात रुग्णदुपटीचा कालावधी अवघा ४० ते ५० दिवसांपर्यंत खाली उतरला होता. तो आता चढत्या आलेखानुसार वाढत आहे. तीन दिवसांवर सरासरी रुग्णदुपटीचा कालावधी १८९ होता, तो आता २१३ दिवसांवर आला आहे. सध्या मुंबईत उपचाराधीन रुग्णांची संख्या ३६,६७४ आहे. आतापर्यंत करोनाने १४,२०० व्यक्तींचा मृत्यू ओढवला आहे. एकूण रुग्ण संख्या ६,८७,१५२ असून त्यापैकी बरे ६,३४,३१५ रुग्ण उपचारानंतर बरे झाले आहेत. तारीख-रुग्ण संख्या २१ फेब्रुवारी २०२१-९२१ २५ फेब्रुवारी-१,१४५ २८ फेब्रुवारी-१,०५१ ५ मार्च-१,१७३ ९ मार्च-१,०१२ १० मार्च-१,५३९ ११ मार्च-१,५०८ १५ मार्च- १५०८