६० दिवसांनंतरही दुसरा डोस प्रभावी

म. टा. विशेष प्रतिनिधी : करोनाला प्रतिबंध करणाऱ्या लशीचा पहिला डोस मिळाला आहे, मात्र दुसरा डोस मिळण्यासाठी नोंदणी करताना अडचणी येत आहेत. दुसरा डोस अद्याप मिळालेला नाही, असे अनेकजण हा डोस घेण्यामध्ये विलंब झाल्यास काही अडचण येईल का, अशी विचारणा करीत आहे. सेव्हन हिल्स रुग्णालयाचे अधिष्ठाता डॉ. बाळकृष्ण अडसूळ यांनी साठ दिवसांपर्यंत कोव्हिशील्डचा दुसरा डोस घेतला तरी अडचण नाही, असे स्पष्ट केले आहे. पहिला डोस घेतल्यानंतर दुसरा डोस त्वरित घेऊ नये, साठ दिवसांपर्यंत लस घेतल्यास शरीरामध्ये अॅण्टीबॉडीज तयार होण्यास मदत होते. कोव्हॅक्सिनचा डोस मात्र चार आठवड्यांनी घ्यायला हवा, कोव्हीशील्डचा दुसरा डोस उशिरा मिळाल्यास सर्वसामान्यांनी चिंता करू नये, असे डॉ. अडसूळ म्हणाले. संसर्गजन्य आजाराचे तज्ज्ञ डॉ. आर. एस. नायर सांगतात, लशीचा पहिला डोस घेतल्यानंतर अॅण्टीबॉडीज तयार व्हायला दोन ते चार आठवड्यांचा कालावधी लागतो. मधल्या काळात काहीजणांना करोना संसर्गाची लागणही झाली, तेव्हा पहिला डोस घेतल्याचा काही उपयोग झाला का, असाही प्रश्न उपस्थित करण्यात आला. ज्यांना पहिला डोस घेतल्यानंतर संसर्गाची लागण झाली त्यांच्यामध्ये लक्षणांची तीव्रता सौम्य होती. लशींची पुरेशी उपलब्धता अद्याप झालेली नाही. त्यामुळे असोसिएशन ऑफ हॉस्पिटलच्या व्यवस्थापकीय समितीच्या बैठकीमध्ये लस उपलब्ध करण्याच्या मुद्द्यावर चर्चा करण्यात आली. यात असोसिएशनचे अध्यक्ष व पी. डी. हिंदुजा रुग्णालयाचे मुख्य कार्यकारी अधिकारी डॉ. गौतम खन्ना यांनी रुग्णालयामध्ये लस मिळण्याची सुविधा केव्हा होईल याची वाट पाहत असल्याचे मत व्यक्त केले. लसीचा पहिला डोस हा रोगाविरोधात प्रतिकारशक्ती निर्माण करण्याचे काम करतो. त्यामुळे शरीरात अॅटिबॉडीज तयार होण्याची प्रक्रिया सुरु होते. पण दुसरा डोस ही प्रक्रिया अधिक वेगवान करतो. दुसरा डोस संपूर्ण संरक्षणासाठी डॉ. नायर सांगतात, पहिला डोस घेतल्यानंतर रोगप्रतिकारशक्ती तयार करण्याचे काम सुरू होते, दुसऱ्या डोसनंतर त्याला अधिक गती येते. त्यामुळे पहिला डोस झाल्यानंतरही करोनाबाधितांच्या संपर्कात आलेल्या अनेक व्यक्तींना पुन्हा संसर्गाची लागण झाली आहे. संपूर्ण संरक्षणासाठी दुसरा डोस आवश्यक आहे.