करोना योद्ध्यांना तणावमुक्त ठेवण्यासाठी मोटिव्हेशनल स्पिकर्स मैदानात

प्रवीण मुळ्ये , करोनाच्या दुसऱ्या लाटेत प्रत्येक जीव वाचवण्यासाठी वैद्यकीय कर्मचारी जीवाची बाजी लावत आहेत. पोलीस, पालिका कर्मचारी रात्रंदिवस जागता पहारा देत आहेत. पण लोकांच्या सुरक्षेसाठी करोनाची दोन हात करण्यात गुंतलेल्या या योद्ध्यांवर येणाऱ्या ताणाचे काय? या सर्वांना प्रसन्न मनाने काम करता यावे यासाठी कोण प्रयत्न करणार? ही जबाबदारी स्वीकारली आहे समाजातील मोटिव्हेशनल स्पिकर्सनी. वेगवेगळ्या प्रयोगांच्या माध्यमातून रुग्णालय कर्मचारी, पोलिस ते अगदी फार्मा कंपनीतील कर्मचाऱ्यांच्या चेहऱ्यावर हास्य खुलवून त्यांना ठेवण्यासाठी ही मंडळी सध्या मैदानात उतरली आहेत. गेली ३५ वर्षे विविध कॉर्पोरेट कंपन्यांसोबत भूपेश दवे मोटिव्हेशनल स्पीकर म्हणून काम करत आहेत. पण सध्या ते आपल्या ज्ञानाचा आणि अनुभवाचा फायदा हे विविध रुग्णालये, अत्यावश्यक सेवेतील कर्मचाऱ्यांना करून देत आहेत. आपल्या कुटुंबापासून दूर जीवाची पर्वा न करता वैद्यकीय कर्मचारी आपली सेवा देत आहेत. प्रचंड तणाव असतानाही चेहऱ्यावर त्याचा लवलेशही न दाखवता या मंडळींनी करोना विरोधातील लढाईत स्वत:ला झोकून दिले आहे. त्यांच्या नेहमीच्या कामातून थोडा ब्रेक देत जेव्हा छोट्यामोठ्या प्रयोगांमधून, खेळांमधून या मंडळींच्या चेहऱ्यावर आम्ही हास्य खुलवण्यात यशस्वी होतो, तेव्हा आमची सारी मेहनत सार्थकी लागते. त्यांच्या हास्यातून मिळणारा आनंद शब्दात व्यक्त करणे अशक्य असल्याचे भूपेश दवे यांनी सांगितले. करोनाच्या पहिल्या लाटेतही भूपेश यांनी पालिका प्रशासन, रुग्णालये, पोलिस प्रशासनासोबत त्यांच्या कर्मचाऱ्यांसाठी स्ट्रेस मॅनेजमेंटचे कार्यक्रम आखले होते. आताही करोनाची कोणतीही भीती न बाळगता ते अत्यावश्यक सेवेतील कर्मचाऱ्यांसाठी आपली विनामूल्य सेवा देत आहेत. करोना लढ्यातील प्रत्येकाचा ताण कमी करण्यासाठी जेथे आपली गरज लागेल तेथे आपण हजर असू, असे भूपेश सांगतात. नृत्य दिग्दर्शक अविनाश पायाळ हा तरुणही करोनायोद्ध्यांसोबत करोना रुग्णांना तणावमुक्त करण्याच्या मोहिमेत आपले योगदान देण्यासाठी पुन्हा एकदा सज्ज झाला आहे. करोनाच्या पहिल्या लाटेतही अविनाशने अनेक करोना रुग्ण आणि रुग्णालय कर्मचाऱ्यांचे मन प्रसन्न ठेवण्याच्या कामात महत्त्वाचे योगदान दिले होते. मला समाजसेवेची आवड आधीपासूनच आहे. सध्या नेहमीची कामेही बंद आहेत. त्यामुळे तुझ्या कलेचा उपयोग रुग्णालयातील रुग्णांच्या सेवेसाठी करशील का? असा प्रश्न मला विचारण्यात आला तेव्हा क्षणाचाही विलंब न करता मी होकार दिला. करोना रुग्ण बरे होऊन जेव्हा आनंदाने घरी जातात तेव्हा त्यांच्या चेहऱ्यवरील हास्यात आपलाही छोटासा वाटा आहे याचे समाधान खूप मोठे असल्याच अविनाश सांगतो. नृत्यांच्या माध्यमातून करोना रुग्णांमध्ये सकारात्मक उर्जा निर्माण करण्यासाठी तशा कार्यक्रमांची आखणी अविनाशने केली आहे. करोना विरोधातील लढाईत आघाडीवर असलेल्या करोना योद्ध्यांना भूपेश दवे, अविनाश पायाळ यासारख्या मंडळींची साथ मिळत असल्यामुळे या लढाईलाही अधिक बळ मिळत आहे हे नक्की.