हार्बर लोकलचा वेग वाढणार

म. टा. प्रतिनिधी माहिम : हार्बर मार्गावर धावणाऱ्या लोकल गाड्यांना माहीम स्थानक परिसरात लागणारा 'तांत्रिक ब्रेक' आता दूर झाला आहे. माहिम यार्ड रिमॉडलिंगचे काम पूर्ण करण्यासह धोकादायक वळणाची तीव्रतादेखील कमी करण्यास पश्चिम रेल्वेला यश आले आहे. या कामामुळे २० किमी प्रतितास या वेगाने धावणारी लोकल आता ५० किमी प्रतितास या वेगाने धावू शकणार आहे. यामुळे प्रवाशांचा प्रवासाचा वेळ वाचण्यास मदत होईल. मध्य रेल्वेच्या लोकल उभ्या करण्यासाठी माहिमला स्टेबलिंग मार्गिकांचा वापर करण्यात येत असे. २०१६ मध्ये नवीन हार्बर मार्ग आणि स्टेबलिंगचा वापर सुरू झाल्यानंतर तीव्र वळणं, वेगमर्यादा असलेल्या माहिम यार्डच्या वापरावर मर्यादा आल्या. हे काम करताना मोठ्या प्रमाणात रेल्वेसेवेवर परिणाम होण्याची भीती होती. यामुळे करोना निर्बंधाच्या काळात वाहतूक कमी असताना हे काम प्राधान्याने पूर्ण करण्यात आले. यार्डच्या कामांमध्ये वळणाची तीव्रता कमी करण्यात आली आहे. वेगमर्यादेत शिथिलता आणण्यात आल्याने अप हार्बर मार्गावरील लोकल फेऱ्या आता ३५ किमी प्रतितास आणि डाउन हार्बर मार्गावरील लोकल फेऱ्या ५० किमी प्रतितास या वेगाने धावतील. पूर्वी दोन्ही मार्गावर २० किमीप्रतितास अशी वेगमर्यादा होती. आतापर्यंत बंद असलेल्या माहिम यार्डात आता १२ डब्यांच्या ३ लोकल उभ्या राहू शकतील, अशी माहिती पश्चिम रेल्वे अधिकाऱ्यांनी दिली. माहीम यार्ड परिसरात अतिक्रमण झालेल्या जागेत मोठ्या प्रमाणात कचऱ्याचे साम्राज्य पसरले होते. आगामी पावसाळ्याचा काळ लक्षात घेता जेसीबी आणि डंपरच्या मदतीने कचरा हटवण्यात आला. यार्ड परिसरात वसलेल्या अनधिकृत झोपड्यांच्या सांडपाण्यामुळे येथे मोठ्या प्रमाणात अस्वच्छता पसरत असे. यावर उपाय म्हणून पश्चिम रेल्वेने रुळांशेजारी नाल्याची बांधणी केली आहे.