सावधान! करोनाच्या तिसऱ्या लाटेत लहान मुलांकडून संसर्गाचा धोका

म. टा. विशेष प्रतिनिधी : करोना संसर्गाच्या तिसऱ्या लाटेमध्ये मुलांना संसर्ग होण्याची शक्यता वैद्यकीय तज्ज्ञांकडून व्यक्त केली जात आहे. मात्र फार कमी मुलांमध्ये संसर्गाची तीव्र लक्षणे दिसून येतील या शक्यतेकडेही बालरोगतज्ज्ञांनी लक्ष वेधले आहे. लक्षणे नसलेल्या कोविड पॉझिटिव्ह मुलांमध्ये करोनाचा संसर्ग झाल्यास ती सुपरस्प्रेडर (संसर्गप्रसारक) ठरू शकतील. त्यामुळे प्रौढ व्यक्तींना संसर्ग झाल्यानंतर जी काळजी व खबरदारी घेतली जाते, तीच काळजी लहान मुलांबाबतही घ्यावी, याकडे डॉक्टरांनी लक्ष वेधले आहे. बालरोगतज्ज्ञ डॉ. बकुल पारेख यांनी लहान मुलांमध्ये संसर्ग होण्याची शक्यता तिसऱ्या लाटेमध्ये असल्याचे सांगितले. त्याचे विश्लेषण करताना ते म्हणाले, 'जून-जुलैपर्यंत लसींची पुरेशी उपलब्धता झाली, तर मोठ्या प्रमाणामध्ये लसीकरण होईल. त्यामुळे लस न घेतलेली राहतील. या विषाणूची संसर्ग क्षमता आता अधिक वाढली आहे. तिसऱ्या टप्प्यामध्ये ती अधिक प्रभावी होईल. त्यामुळे लहान मुलांना संसर्ग होण्याची शक्यता नाकारता येत नाही. मात्र लहान मुलांमधील रोगप्रतिकारशक्ती आणि त्यांच्या वयाच्या वेगवेगळ्या टप्प्यांमध्ये झालेल्या लसीकरणामुळे त्यांच्यामध्ये तीव्र स्वरूपाची लक्षणे कमी दिसून येतील. ज्या मुलांमध्ये संसर्ग अधिक प्रमाणात दिसून येईल, त्यांना लक्षणाधारित वैद्यकीय उपचार तत्काळ सुरू करणे गरजेचे आहे. पहिल्या लाटेमध्ये अनेक लहान मुलांमध्ये कुटुंबातील इतर सदस्यांना संसर्ग झाल्यानंतरही करोनाची लक्षणे दिसून आली नाहीत. दुसऱ्या लाटेमध्ये संसर्गाची लक्षणे होती. मात्र ती सौम्य ते मध्यम स्वरूपातील होती. ९९ ते १०० ताप, सर्दी, खोकला या स्वरूपाच्या लक्षणांची तीव्रता मुलांमध्ये अधिक होती. त्यांना प्रौढ व्यक्तींच्या वॉर्डमध्ये दाखल करून वैद्यकीय उपचार देण्यात येत होते. या लाटेमध्ये मुलांना संसर्ग होण्याची शक्यता अधिक बळावली, तर त्यांच्यासाठी सरकारने विशेष वैद्यकीय उपचारांचा आराखडा तयार केला आहे. डॉ. एस. व्ही. माणिक यांनी लक्षणे नसलेली अनेक मुले ही सुपरस्प्रेडर ठरू शकतात. त्यामुळे घरगुती स्वरूपामध्ये विलगीकरण केले असेल, तर विशेष काळजी घेणे, मुलांना लक्षणे कळत नसली तरीही त्यांच्याकडे विचारणा करणे, त्वचेच्या रंगात बदल दिसल्यास वा अंगावर पुरळ, चट्टे उमटणे, भूक न लागणे, उलट्या होणे, पोटदुखी, डायरिया या लक्षणासंदर्भात डॉक्टरांना त्वरित माहिती द्यावी, याकडेही त्यांनी लक्ष वेधले. संसर्गाचे प्रमाण राज्यात १ ते १० या वयोगटातील १ लाख ६६ हजार ३४९ तर ११ ते २० वयोगटातील ३ लाख ८१ हजार ४०८ मुलांमध्ये करोनाची लागण झाल्याचे सरकारने दिलेल्या माहितीवरून स्पष्ट होत आहे. एकूण आकडेवारीमध्ये हे प्रमाण ३.०७ आणि ७.०४ टक्के इतके नोंदवण्यात आले आहे.